Panorama Airways aviakompaniyasining Toshkent – Madina yo‘nalishi bo‘yicha parvozlari 12 soatdan ko‘proqqa kechiktirildi. Bu haqda Uzbekistan Airports matbuot xizmati ma’lum qildi.

Qayd etilishicha, aviakompaniyaning Toshkent – Madina yo‘nalishi bo‘yicha 5P5381 va 5P5369 reyslari poytaxt aeroportiga samolyotlarning kech yetib kelgani sabab kechiktirilgan.

Aviakompaniya yo‘lovchilarni ichimliklar va issiq ovqat bilan ta’minlab, mehmonxonaga joylashtirishni taklif qilgan.

“Har ikki reys ham yaqin soatlarda manzil aeroportiga jo‘nab ketishi rejalashtirilgan. Parvoz jadvaliga kiritilgan o‘zgartirishlar to‘g‘risidagi batafsil ma’lumotlarni aviatashuvchidan olish mumkin”, – deyiladi xabarda.

Avvalroq Farg‘ona vodiysidagi ob-havo sharoiti tufayli qator reyslarga cheklovlar kiritilgandi. Parvozlar xavfsizligini taʼminlash maqsadida HY9801/9802 Namangan-Perm-Namangan, HY9805/9806 Namangan-Samara-Namangan yo‘nalishlari o‘zgartirilgan jadval bo‘yicha Toshkent xalqaro aeroportidan amalga oshiriladi.

• Uzbekistan airways