Qo‘shma Shtatlar prezidentining so‘zlariga ko‘ra, Vashington va Tehron “kelishuvga juda yaqin” turibdi.

“22-may kuni telefon orqali suhbatda Isroil bosh vaziri Binyamin Netanyaxuga Eronning yadroviy obyektlariga zarba bermasligini aytdim. Men unga hozir buni qilish noo‘rinligini bildirdim, chunki biz Tehron bilan kelishuvga juda yaqinmiz”, — degan Tramp Oq uyda jurnalistlarga bergan intervyusida.

“AQSh prezidentining fikricha, Eron yadroviy inqirozini “juda kuchli hujjat” yordamida va harbiy harakatlarsiz ham hal qilish mumkin”, – deb yozadi Axios.

Vashington Tehrondan yadroviy qurol ishlab chiqishdan to‘liq voz kechishni talab qilmoqda. Bir necha raund o‘tkazilgan muzokaralardan so‘ng Eron Qo‘shma Shtatlarning yadroviy dasturdan butunlay voz kechish talabi o‘rniga arab davlatlari va AQSh investitsiyasi ishtirokida uranni boyitish bo‘yicha qo‘shma korxona tashkil etishni taklif qildi.

Ommaviy axborot vositalari ma’lumotiga ko‘ra, Isroil Eronning yadroviy obyektlariga zarba berish imkoniyatini ko‘rib chiqmoqda. CNN’ning xabar berishicha, 21-may kuni AQSh yangi razvedka ma’lumotlarini olgan va bu Isroil zarbasi ehtimoli “sezilarli darajada oshganini” ko‘rsatgan. AQSh va Eron o‘rtasidagi yadroviy kelishuv istiqboli — Isroil norozi bo‘layotgan asosiy omillardan biri bo‘lib, bu zarba ehtimolini yanada oshirmoqda.

• AQSh
• Binyamin Netanyaxu
• Eron
• Isroil
• Ogohlantirish
• Tramp