AQSh prezidenti Donald Tramp The New York Post gazetasiga Rossiya prezidenti Vladimir Putin bilan telefon orqali Ukrainadagi urush haqida gaplashganini ma’lum qilgan.

Bu qachon sodir bo‘lganligi noma’lum. Ikki davlat rahbari telefonda necha marta gaplashgani haqidagi savolga Tramp: “Buni aytmaganim yaxshi”, – deya javob bergan.

Trampning so‘zlariga ko‘ra, Putin “odamlar jang maydonida o‘lishini to‘xtatishni” istaydi. AQSh prezidenti, shuningdek, urushni qanday tugatish bo‘yicha aniq rejasi borligini aytgan.

AQSh vitse-prezidenti Vens kelasi hafta bo‘lib o‘tadigan Myunxen xavfsizlik konferensiyasida Ukraina prezidenti Volodimir Zelenskiy bilan uchrashadi. Avvalroq, Tramp kelasi haftada Zelenskiy bilan uchrashishi mumkinligini aytgan edi.

Tramp, shuningdek, xavfsizlik kafolatlari evaziga Ukrainaning nodir metallari va boshqa resurslaridan foydalanish uchun Zelenskiy bilan 500 mln dollarlik shartnoma tuzmoqchi ekanligini aytgan.

• AQSh
• Intervyu
• Putin
• Rossiya
• Telefon
• Tramp