O‘zbekiston Prezidenti Shavkat Mirziyoyev Qozog‘istonning markaziy gazetasi – “Yegemen Qazaqstan” gazetasiga intervyu berdi. Davlat rahbari gazeta muxbirining O‘zbekiston taraqqiyoti, ikki tomonlama munosabatlarning holati va istiqbollari hamda Markaziy Osiyodagi hamkorlikka oid savollariga javob bergan.

Jumladan, mazkur nashr muxbiri O‘zbekiston rahbaridan Turkiy davlatlar tashkiloti imkoniyatlarini qanday baholashi hamda tashkilotning turkiy dunyo mamlakatlari o‘rtasidagi hamkorlikni rivojlantirishda qanday amaliy rol o‘ynashi haqida so‘radi.

– Turkiy davlatlar tashkilotini biz hali foydalanilmagan va birlashtiruvchi salohiyatga ega mintaqaviy hamkorlikning samarali mexanizmi sifatida ko‘ramiz.

Tashkilotning ahamiyati haqida gapirganda, avvalo, muhtaram oqsoqolimiz Nursulton Nazarboyevning turkiy dunyoni birlashtirish g‘oyasini konseptual ishlab chiqish va amalga oshirishdagi, shuningdek, bu boradagi ulkan, fundamental rolini alohida ta’kidlamoqchiman.

Bu tuzilma turkiy davlatlarning til va din mushtarakligiga, tarixiy-madaniy aloqalariga asoslanibgina qolmay, eng muhimi, ularning muloqoti va hamkorligi, eng avvalo, iqtisodiy va barqaror rivojlanish, zamonaviy chaqiriqlarga mos javoblarni birgalikda ishlab chiqishni chuqurlashtirishdan manfaatdorligi tufayli rivojlanmoqda.

Shu bois O‘zbekiston Turkiy kengashga to‘laqonli a’zo sifatida qo‘shildi va 12-noyabr kuni Istanbulda bo‘lib o‘tgan sakkizinchi sammitda uning Turkiy davlatlar tashkilotiga aylanishini qo‘llab-quvvatladi.

Bugungi kunda tashkilot oldida qator muhim vazifalar turibdi. Bizningcha, bu, birinchi navbatda, ishtirokchi davlatlar o‘rtasidagi savdo-iqtisodiy aloqalarni yanada rivojlantirish va mustahkamlashdir. Shu munosabat bilan biz o‘zaro tovar ayirboshlash hajmini oshirish bo‘yicha takliflar ishlab chiqish uchun turkiy davlatlar o‘rtasida savdo hamkorligi ilmiy-tadqiqot markazini tashkil etish taklifini ilgari surdik. Ishtirokchi davlatlarning transport sohasida o‘zaro hamkorlik dasturining qabul qilinishi tashkilotning integrasiya salohiyatini ro‘yobga chiqarishda hal qiluvchi ahamiyatga ega bo‘ladi.

Shuningdek, innovatsion va texnologik rivojlanishning yangi modeliga o‘tish, jumladan, yashil, ekologik toza, energiya tejovchi va xavfsiz texnologiyalarni joriy etish, ekologik inqiroz oqibatlarini yumshatish va atrof-muhitni muhofaza qilish bo‘yicha tashabbuslarni amalga oshirish, turizmdan barqaror rivojlanish omili sifatida foydalanishda ham kuchlarni birlashtirishimiz kerak. Ekologik ofatlardan eng ko‘p jabr ko‘rgan mintaqa – Orol dengizi bo‘yidagi turkiy davlatlarning ekologik tuzilmasini shakllantirish bo‘yicha barqaror ekspertlar va IT-mutaxassislar platformasi, shtab-kvartirasini yaratish tashabbusi ham shunga qaratilgan.

Mamlakatlarimiz taraqqiyotida yoshlarning o‘rni ortib borayotganini hisobga olib, ularning salohiyatini to‘liq ro‘yobga chiqarish maqsadida 2022-yilni Turkiy dunyoda “Yoshlar tashabbuslarini qo‘llab-quvvatlash yili” deb e’lon qilishni taklif qildik.

Ishonchim komilki, turkiy davlatlar ulkan resurslar – tarixiy, madaniy va ma’naviy merosga eng boy, ulkan intellektual va iqtisodiy salohiyat, bag‘rikenglik va ma’rifat an’analariga ega va u insoniyat oldida turgan global muammolarni hal etishda tobora muhim rol o‘ynaydi, – dedi O‘zbekiston Prezidenti Shavkat Mirziyoyev.

• Intervyu
• Mirziyoyev
• O‘zbekiston
• Qozog‘iston