AQSH Xalqaro taraqqiyot agentligi (USAID) O‘zbekistondagi qishloq ayollarini qo‘llab-quvvatlash uchun 2,4 mln dollar ajratadi.

Bu haqda O‘zbekiston Qishloq xo‘jaligi vazirligida bo‘lib o‘tgan vazirlik vakillarining USAIDning Osiyo byurosi maʼmuriyati yordamchisi o‘rinbosari Anjali Kaur bilan bo‘lib o‘tgan uchrashuvida maʼlum qilindi.

Uchrashuv chog‘ida tomonlar USAID va vazirlik o‘rtasida “Agrobiznesni rivojlantirish” qo‘shma loyihasi doirasida bog‘dorchilik, qo‘shilgan qiymatli mahsulotlarni ishlab chiqarish, ayollarning iqtisodiy huquq va imkoniyatlarini kengaytirish kabi yo‘nalishlarda hamkorlikni yana-da mustahkamlash masalalarini ham muhokama qilishdi.

“USAIDning O‘zbekiston hukumati va xususiy sektori bilan hamkorlikda olib boradigan ishining asosiy elementi ayollarning iqtisodiy imkoniyatlarini kengaytirishga qaratilgan saʼy-harakatlardir. Gender tenglik va ayollar huquq va imkoniyatlarini kengaytirish bizning taraqqiyot borasidagi ishimizning markazida turadi. AQSh O‘zbekistondagi ayollarga bog‘dorchilik sohasida o‘z ishini boshlash va rivojlantirish, yangi korxonalar ochish va mavjudlarini kengaytirishga yordam berdi. Bugun men USAID joriy yil yozida O‘zbekistondagi qishloq ayollari iqtisodiy imkoniyatlarini kengaytirishi uchun qo‘shimcha ravishda 2,4 million dollar ajratishini eʼlon qilishdan juda mamnunman”, – deydi Anjali Kaur.

Tadbirda taʼkidlanganidek, ushbu mablag‘lar O‘zbekiston, ayniqsa, Orolbo‘yi hududidagi qishloq ayollarini qo‘llab-quvvatlash, ularga tadbirkorlik ko‘nikmalarini o‘rgatish, kasb-hunar berish, mikromoliyalashtirish, murabbiylik va bandlik dasturlarini amalga oshirish uchun yo‘naltiriladi.

• Ayollar
• O‘zbekiston
• USAID