Joriy yilning 4-yanvar sanasidan boshlab "UzAuto Motors SAP" hisob dasturiy ta’minotini amalga oshirish va mahsulot inventarizasiyasini o‘tkazayotganligi munosabati bilan, ushbu muddatda kontraktasiya shartnomasini tuzish, barcha avtomobillarni topshirish va to‘lovlarni qabul qilish vaqtincha to‘xtatilgan edi.

Bugun, 9-yanvar kuni kompaniya ushbu muddatni yana uzaytirganini ma’lum qildi.

“Barcha avtomobillarni topshirish va to‘lovlarni qabul qilish yana bir necha kunga to‘xtatiladi. Bundan tashqari, dasturiy ta’minotni ishga tushirish tadbirlarining o‘tkazilishi munosabati bilan "UzAvtoSavdo" ilovasi faoliyati ham vaqtincha to‘xtatib turilishi mumkin”,– deyiladi xabarda.

Dasturiy ta’minotni yangilash va inventarizasiya ishlari yakunlangandan so‘ng, kontraktasiya shartnomalarini tuzish, oldindan to‘lovni qabul qilish va avtomobilni yetkazib berish to‘liq hajmda qayta tiklanadi.

“Iste’molchilarimizni ishontirib ayta olamizki, 2022-yil, yangi yil arafasida avtomobil yetkazib berish bo‘yicha shartnoma tuzgan va vaqtinchalik cheklov uchun oldindan to‘lovni amalga oshira olmagan shaxslar ish qayta tiklanganidan so‘ng, avtomobil uchun oldindan to‘lovni amalga oshirishi mumkin. Shu bilan birga, ular tomonidan avtomobil yetkazib berish bo‘yicha tuzilgan shartnomalar o‘z kuchida qoladi, faqat oldindan to‘lov muddati uzaytiriladi”– deyiladi kompaniya xabarida.

"UzAuto Motors" kompaniyasi iste’molchilardan yuzaga kelgan vaqtinchalik noqulayliklar uchun so‘ramoqda.

• Avtomobil uchun shartnoma
• UzAutoMotors