“Uzbekistan Airports” hamda Yangihayot tumani hokimligi bilan birgalikda yangi yashil hudud barpo etilib, qariyb ikki mingta daraxt ekildi. Tadbir “Yashil makon” respublika loyihasi doirasida oʻtkazildi. Bu haqda “Uzbekistan Airports” xabar berdi.

Qayd etilishicha, ikki kilometrdan ortiq va taxminan yetti gektar maydonga ega boʻlgan, keng ariq bilan ajratilgan hudud kelgusi yillarda piyodalar yoʻlaklari, skameykalar va bolalar maydonchalari boʻlgan chiroyli yashil maydonga aylanadi.

Oʻz navbatida, ushbu fikrni amalga oshirish maqsadida “Uzbekistan Airports” shahar hokimiyatiga murojaat qilgan. Yangihayot tumanida mos joy topilgan va dam olish kunlarida ushbu joyni koʻkalamzorlashtirish boshlangan.

“Bizda aksiya uchun, hisobot berish uchun yoki chiroyli fotosuratlar uchun harakat qilish maqsadi boʻlmadi, aksincha odamlar uchun bogʻ barpo etish gʻoyasi tugʻildi. Biz uzoq vaqt davomida mos keladigan joy topa olmadik, chunki, bogʻ uchun asosiy shartlardan biri — sugʻorish tizimi hisoblanadi.

Yangi Yangihayot tumanida turar joy majmuasi boʻyida ariq bilan ajratilgan keng yoʻlak topildi. Bu joyni “Аviatsiya sohil boʻyi” deb ham nomlab boʻldik”, — deydi “Uzbekistan Airports” AJ boshqaruvi raisi Raʼno Joʻrayeva.

• Aeroport