Avvalroq, Bombardier CRJ700 layneri qo‘nish chog‘ida vertolyot bilan to‘qnashib, daryoga qulab tushgani haqida xabar bergan edik. Fojia 29-yanvar mahalliy vaqt bilan soat 21:00 da sodir bo‘lgan. Samolyot bortida 60 nafar yo‘lovchi va to‘rt nafar ekipaj a’zosi bo‘lib, u Kanzasdan uchib kelayotgan bo‘lgan. Hozirda, Vashington yaqinidagi Ronald Reygan milliy aeroportida barcha reyslar vaqtincha to‘xtatilib, qutqaruv operatsiyasi boshlangan.

Reuters agentligiga ko‘ra, vertolyot mashg‘ulot parvozini bajarayotgan bo‘lib, uning bortida uch nafar harbiy bo‘lgan. Ular haqida hozircha ma’lumot berilmagan.

Federal fuqaro aviatsiyasi boshqarmasi ma’lumotlariga ko‘ra, qulashdan oldin qo‘nishga tayyorgarlik ko‘rayotgan samolyot dispetcherlardan uchish-qo‘nish yo‘lagini o‘zgartirishga ruxsat so‘ragan. Dispetcherlar bu so‘rovni tasdiqlagan va vertolyot bilan bog‘lanib, yo‘l bo‘shatishni so‘ragan. Biroq, oradan bir daqiqadan kamroq vaqt o‘tib, to‘qnashuv yuz bergan.

Qo‘shma Shtatlar ommaviy axborot vositalariga ko‘ra, qutqaruvchilar hali tirik qolganlarni topa olishmagan. Qidiruv ishlari davom ettirilayotgani aytilmoqda.

• AQSh
• Aviahalokat
• Inson
• Qurbon