Vengriyada o‘zbekistonlik talabalarga ajratiladigan grant soni oshirildi. Bu haqda Oliy va o‘rta maxsus taʼlim vazirligi axborot xizmati xabar bermoqda.

Kecha Investitsiyalar va tashqi savdo vaziri Sardor Umurzakov hamda Vengriya tashqi ishlar va tashqi iqtisodiy aloqalar vaziri Peter Siyyarto hamraisligida O‘zbekiston va Vengriya o‘rtasidagi iqtisodiy hamkorlik bo‘yicha hukumatlararo komissiyasining yuqori darajadagi navbatdagi yig‘ilishida ushbu memorandiumga o‘zgartirishlar kiritish to‘g‘risidagi bayonnoma imzolandi.

Shundan so‘ng, O‘zbekiston Respublikasi Oliy va o‘rta maxsus taʼlim vazirligi bilan Vengriya Tashqi ishlar va savdo vazirligi o‘rtasida O‘zbekiston fuqarolari uchun Vengriya tomonidan har yili ajratib kelinayotgan taʼlim grantlari sonini ko‘paytirish bo‘yicha kelishuvga erishilgani mamnuniyat bilan qayd etildi.

Maʼlum qilinishicha, 2020-yilda O‘zbekiston va Vengriya davlatlari o‘rtasida imzolangan tegishli memorandumga ko‘ra, O‘zbekiston fuqarolari uchun Vengriya  oliy taʼlim muassasalarida bakalavr, magistratura va doktorantura bosqichlarida o‘qish uchun yiliga jami 100 tadan taʼlim grantlari ajratib kelinayotgan edi.

Unga ko‘ra 2023/2024 o‘quv yilidan boshlab, Vengriya tomonidan har yili ajratilayotgan taʼlim grantlari soni 100 tadan 170 taga ko‘paymoqda.  

• Grant
• Oliy ta'lim
• Toshqulov
• Vengriya