“Xalq banki”ning Andijon viloyati Amaliyot bo‘limi xodimlari katta miqdorda pul o‘zlashtirgani aniqlandi. Bu haqda Bosh prokuratura matbuot xizmati xabar berdi.

Ma’lum bo‘lishicha, Bosh prokuratura tomonidan AT “Xalq banki” Andijon viloyati Amaliyot bo‘limi xodimlari va boshqalarga nisbatan qo‘zg‘atilgan jinoyat ishi yuzasidan tergov harakatlari olib borilmoqda.

“Tergov davomida bank xodimlari 4,6 milliard so‘mni o‘zlashtirganliklari aniqlangan”, deyiladi prokuratura xabarnomasida.

Ushbu kamomadga yo‘l qo‘ygan 13 nafar bank xodimlariga Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yo‘li bilan talon-toroj qilish) bilan ayb e’lon qilingan. 11 nafariga esa qamoq, 2 nafariga garov ehtiyot choralari qo‘llanilgan. Tergov harakatlari olib borilmoqda.

• Andijon
• Jinoyat
• Xalq banki