Toshkent aholisi va mehmonlari xavfsizligini taʼminlaydigan sunʼiy intellektual tizim ishlab chiqildi. Bu tuzilma Toshkent Ichki ishlar bosh boshqarmasining yagona tezkor boshqaruv markazida joylashgani aytilmoqda. O‘zbekiston prezidenti Shavkat Mirziyoyevning shaxsan o‘zi ushbu tizim faoliyatini ko‘zdan kechirdi. Maʼlumotlarga ko‘ra, dastur milliy dasturchilarimiz tomonidan ishlab chiqilib, real vaqt davomida kim qayerda va qachon jinoyat sodir etganini kechayu kunduz kuzatib aniqlaydi.

Bu poytaxtdagi yetti yarim ming video kameralar, davlat organlarining 55 ta elektron maʼlumotlar bazasi hamda ixtisoslashgan axborot bazalarining integratsiyalashuvi natijasida amalga oshiriladi. Sistema ishga tushirilgandan buyon 925 ta jinoyat fosh etilgan, 30 ta o‘g‘irlangan avtomobil va 80 ta bedarak yo‘qolgan shaxs topilgan. Sunʼiy intellekt qidiruv tizimi orqali 1735 ta jinoyatda gumonlanib qidiruvga berilgan shaxslar ushlangan. Davlat rahbari bu tizimni mahalla nozirlari faoliyatiga ham qaratish, tezkorlikni oshirish to‘g‘risida qo‘shimcha topshiriqlar bergan.

• Jamoat xavfsizligi
• Prezident