Xorazm milliy tabiat bog‘i inspektori Amurbek O‘rinovga xizmat vaqtida tan jarohati yetkazildi.

2024-yil bahorida “Yashil makon” umummilliy loyihasi doirasida milliy bog‘ hududiga 3000 tup gujum ko‘chatlari ekilgan. Ammo bu ko‘chatlar nobud bo‘lish holatiga kelib qolgan. Bunga milliy tabiat bog‘iga tutash hududda “Amudaryo oltin baliq” f/x tomonidan ajratilgan yer maydonidan tashqariga chiqib, gujum ko‘chatlari ekilgan joyga sholi ekish maqsadida maydon chetidagi katta himoya chegaralarini buzib tashlangani va suv ochib yuborilgani sabab bo‘lgan. Buning oqibatida gujum ko‘chatlari bir necha kun suv ostida qolib ketgan. Xorazm milliy tabiat bog‘i ma’muriyati tomonidan fermer xo‘jaligiga 1 kun muddatda suv chiqarib yuborilmasa, 3000 dan ziyod ko‘chat nobud bo‘lishi va bu ma’muriy javobgarlikka tortilishi yuzasidan ogohlantirish xati berilgan.

Ammo fermer xo‘jaligi rahbari A.O‘. bu ogohlantirishga parvo qilmasdan, 4-iyun kuni kechqurun soat tungi 00:00 lar atrofida bog‘ hududiga suv ochish maqsadida kirgan. Shu paytda uni inspektor payqab qolgan va huquqbuzarlikni bartaraf qilishga uringan. Lekin mast holatda bo‘lgan A.O‘. inspektorga qarshilik ko‘rsatgan va uni do‘pposlab, tan jarohati yetkazgan.

Inspektor Yangibozor tuman tez tibbiy yordam muassasasiga yotqizilgan. Ayni damga kerakli muolajalar ko‘rsatilmoqda.

Holat yuzasidan tegishli hujjatlar Xorazm viloyati Ichki ishlar boshqarmasi Yangibozor tumani bo‘limiga qonuniy chora ko‘rish uchun yuborilgan.

Ma’lumot uchun, “Amudaryo oltin baliq” f/x rahbari A.O‘. bundan oldin ham Xorazm milliy tabiat bog‘i hududida huquqbuzarlik sodir etgan va sud tomonidan tegishli jazoga tortilgan.

• Xorazm