Xorazm viloyati Urganch shahrida ulkan bronza ot hamda uning ustida Jaloliddin Manguberdi siymosi bo‘ladigan haykal o‘rnatilishi kutilmoqda. Ma’lum bo‘lishicha, haykal Rossiyaning Jukovskiy shahrida yasalmoqda. 

Haykalning balandligi 25 metr, umumiy massasi esa 50 tonnadan yuqori. Loyiha rahbari Vitaliy Kazanskiyning aytishicha, haykal Ginnesning rekordlar kitobiga kirishi tayin, chunki bronzadan yasalgan ulkan ot haykali dunyoda yo‘q.

Eslatib o‘tamiz, Urganch shahar hokimligi axborot xizmati shahardagi bog‘da o‘rnatilgan  haykalni ko‘chirilishi bo‘yicha bayonot berdi. Unga ko‘ra, Urganch shahridan o‘tuvchi "Shovot" kanalining chap qirg‘og‘ida joylashgan "Jaloliddin Manguberdi" bog‘idagi Jaloliddin Manguberdi haykali viloyat qurilish bosh boshqarmasi huzuridagi Arxitektura-shaharsozlik Kengashi tomonidan Shimoliy g‘arbiy okrug 53008 harbiy qismning maydoniga ko‘chirib o‘tkazilishi taklifi ishlab chiqilgan. Uning o‘rni esa obodonlashtirilib, aholi dam olish hiyoboniga aylantirilishi belgilangan.

"Bugungi kunda "Janubgaz qurilish" aksiyadorlik jamiyati hamda Urganch shahar Obodonlashtirish boshqarmasi tomonidan "Shovot" kanalining chap qirg‘og‘ida joylashgan Jaloliddin Manguberdi haykalini ko‘chirish va o‘rnini aholi dam olish hiyoboniga aylantirilish ishlari olib borilmoqda" – deyiladi bayonotda.

• Rossiya
• Xorazm