Ijtimoiy tarmoqlarda Xorazmda maktab o‘quvchilari sholi o‘rimiga jalb qilingani haqida xabarlar tarqaldi. Voqea yuzasidan Oliy Majlis Senati rasmiy munosabat bildirdi.

Ma'lum qilinishicha, ushbu holat Odam savdosiga va majburiy mehnatga qarshi kurashish Milliy komissiyasi tomonidan nazoratga olindi.

Milliy komissiya aʼzolari tomonidan maktab o‘quvchilarning sholi o‘rimi ishlariga jalb qilinishi holati zudlik bilan o‘rganilmoqda hamda masʼullarning faoliyatiga huquqiy baho berilishi masalasi nazoratga olingan.

Qayd etilishicha, mazkur holat bo‘yicha o‘rganish natijalari haqida qo‘shimcha axborot beriladi.

Shu o‘rinda, Senat Konstitutsiyaga muvofiq mamlakatda majburiy mehnat taqiqlanganligini hamda milliy qonunchilikda bolalar mehnati va majburiy mehnat uchun maʼmuriy va jinoiy javobgarlik belgilanganligi haqida eslatib o‘tgan.

"Agar Siz yoki voyaga yetmagan farzandingiz majburiy tarzda biror bir mehnatga jalb etish, munosib mehnat va dam olish sharoitlarini yaratish, ish haqini o‘z vaqtida bermaslik bilan bog‘liq muammolarga duch kelsangiz “1176” hamda “1092” raqamli “ishonch telefon”lariga murojaat qilishingizni so‘raymiz.

Har bir maʼlumot va murojaat belgilangan tartibda tezkorlik bilan o‘rganib chiqiladi va tegishli zarur choralar ko‘riladi. Murojaatchining roziligisiz shaxsiga doir biron-bir maʼlumot oshkor etilmasligi kafolatlanadi", deyiladi xabarda.

• Majburiy_mehnat
• Senat
• Xorazm