Davlat bayrog‘i qabul qilingan kunning 32 yilligi munosabati bilan “Yangi nafas” ommaviy yugurish musobaqasi bo‘lib o‘tdi. O‘zbekistonning 16 ta shahrida bir vaqtda tashkil etilgan sport tadbiri sog‘lom turmush tarzi tarafdorlarini o‘zida jamladi.

Musobaqa Toshkent shahrida, Nurafshon, Guliston, Andijon, Namangan, Farg‘ona, Jizzax, Samarqand, Navoiy, Buxoro, Qorovulbozor, Termiz, Qarshi, Gʻuzor, Xiva va Nukus shaharlarida tashkil etildi.

Poytaxtda o‘tgan tantanali ochilish marosimida so‘z olgan rasmiylar bu kabi musobaqalarni o‘tkazish an’ana tusiga kirib qolgani, bu orqali mamlakatimiz aholisi orasida sog‘lom turmush tarzi targ‘iboti yanada kuchayib borayotgani haqida to‘xtalishdi.

Poytaxtimizda ushbu sport tadbiri shaharning eng markazi – “Humo Arena” sport majmuasining maydonida bo‘lib o‘tdi, unda 8 mingga yaqin ishtirokchi 3 va 10 km masofalarga yugurish bo‘yicha bellashish uchun yig‘ildi. Boshqa shaharlarda ommaviy yugurish musobaqasi umumiy 3 km masofada tashkil etildi.

Ta’kidlash joizki, keng ko‘lamli sport tadbirini tashkil etish uchun respublika bo‘ylab 450 dan ortiq volontyorlar jalb etilgan. Tashkilotchilar tomonidan hakamlar va murabbiylar uchun o‘quv mashg‘ulotlari o‘tkazildi, Qarshi, Namangan va Nukus shaharlarida matbuot anjumanlari tashkil etildi. Yosh avlod tarbiyasi “Yangi Nafas” harakatining muhim yo‘nalishidir. Bayramda Oliy ta’lim, fan va innovatsiyalar vazirligi ko‘magida O‘zbekistonning 211 ta oliy ta’lim muassasalaridan 50 mingdan ortiq talaba faol ishtirok etdi.

Toshkentda 3 km masofada g‘oliblikni ayollar orasida Anastasiya Silchenkova, erkaklar orasida Xasan Mirsoatov qo‘lga kiritdi. 10 km masofaga yugurishda esa – Marina Xmelevskaya va Nodirbek Mutalipov g‘alabaga erishdi.

• Farg‘ona
• Marafon
• Toshkent
• Xiva
• musobaqa