Yangi yil kechasi Toshkent shahri markazida “ognetushitel” portlatganlarga nisbatan Toshkent shahar IIBB tergov bo‘limi boshqarmasi Jinoyat kodeksining 250-moddasi 2-qismi "b" bandi bilan jinoyat ishi qo‘zg‘atdi.

Tergov jarayonida aniqlanishicha, poytaxtlik yigit yangiyo‘llik tanishi bilan bog‘lanib, undan qo‘lbola usulda yasalgan portlagichni topib berishni so‘ragan. Tayyor bo‘lgan qo‘lbola portlagich 500 ming so‘mga baholanadi va 470 ming so‘mga sotib olinadi.

“O‘sha kuni yo‘lning o‘rtasiga chiqib moslamani joylashtirdim. Moslamani o‘zim yoqdim. Moslama yonganidan keyin, oradan 15 soniya o‘tgach portladi”, – dedi “ognatushitel”ni portlatgan yigit.

Mazkur hodisa oqibatida 3 nafar fuqaro jabrlangan. Ularning ikki nafariga uy sharoitida davolanishi uchun javlb berilgan, ammo bir nafari ayni paytgacha shifoxonada qolmoqda.

“O‘sha kuni yo‘lning o‘rtasiga ko‘plab odamlar yig‘ildi. Odamlar ko‘pligi bois nimaligini ko‘rmadim. Men salyut deb o‘ylagandim. Kuchli portlash bo‘ldi, nima bo‘lganini sezmadim. Yonimdagi bir yigit oyog‘ing qonayapti, deb aytdi. Keyin meni shahar 1-sonli shifoxonasiga olib kelishdi”, – dedi shifoxonadagi yigit.

Olib borilayotgan tergov tezkor harakatlari davomida mazkur hodisaga daxldor bo‘lgan 13 nafar shaxslarga nisbatan ayblov e’lon qilinib JpKning 221-moddasi tarkibida qamoq bilan bog‘liq ehtiyot chorasi qo‘llanildi. Ularning 5 nafari ma’muriy tartibda qamoqqa olindi va yana 5 nafari ma’muriy jarimaga tortildi.

Ushbu holat yuzasidan jinoyat ishi qo‘zg‘atilgan va aybdor shaxslarga nisbatan qamoqqa olish ehtiyot chorasi qo‘llanilgan. Mazkur Jinoyat kodeksining yuqoridagi moddalariga asosan aybdor shaxslar 3 yildan 5 yilgacha qamoq jazosiga mahkum qilinishi mumkin.

• IIBB
• Jinoyat
• Toshkent
• Yangi yil