O‘zbekiston boks terma jamoasi bosh murabbiyi To‘lqin Qilichev Hasanboy Do‘smatovning Olimpiada chempionligini nishonlash vaqtida yurak xurujiga uchragan edi.

Keyinchalik esa Buyuk Britaniya tibbiy yordam ko‘rsatish shtabining ikki nafar a’zosi To‘lqin Qilichevning hayotini saqlab qolishgandi.

Bugun, 11-avgust kuni O‘zbekiston boks federatsiyasi To‘lqin Qilichevning holati haqida rasmiy ma’lumot berdi.

“Bugun xorijiy ommaviy axborot vositalarida terma jamoamiz bosh murabbiyi To‘lqin Qilichev bilan bog‘liq xabarlar tarqaldi.

Hammangizga ma’lumki, murabbiylik faoliyati juda murakkab ish, ayniqsa bu darajadagi nufuzli Olimpiya o‘yinlarida jamoani tayyorlash, musobaqadagi ishtirokdan so‘ng g‘alaba va mag‘lubiyatga ko‘nikish murabbiydan katta ruhiy bosimni, shu bilan birga bunday yuqori darajadagi musobaqa odamdan kuchli matonat va ruhiy zo‘riqishlarni talab qiladi.

Kuni kecha terma jamoamiz bosh murabbiyi To‘lqin Qilichev sog‘ligida biroz muammolar kuzatilgan hamda sportchilar kiyinish xonasida tashkiliy qo‘mita shifokorlari tomonidan murabbiyimizga zudlik bilan birinchi yordam ko‘rsatilgan.

Hozirgi kunda murabbiyimizning sog‘ligi mo‘tadil, o‘zini yaxshi his qilmoqda. Biroz muolajalar olishi talab etiladi.

Ushbu yutuqlarda, butun dunyo boksida birinchi bo‘lishimizda murabbiyimizning juda ulkan hissasi bor. To‘lqin Qilichevga sog‘lik tilab, tezroq safimizga qaytishini kutib qolamiz.

Ishonamizki, tez kunlarda jamoamiz safiga qaytib, yana bokschilarimizni g‘alabalar tomon boshlab boradi”, – deyiladi federatsiya xabarida.

• Boks
• Olimpiada