Ta’lim olish jarayonidagi ko‘pchilik yoshlar uchun oliy o‘quv yurtiga o‘qishga kirish eng muhim bosqich hisoblanadi. Amerikada bu borada ikkita variantga duch kelasiz: universitet yoki kollej. Ular bir-biridan qanday farq qilishi va biri ikkinchidan obro‘liroq yoki yo‘qligiga aniqlik kiritamiz.

“University” so‘zining “college” so‘ziga qaraganda yoshi kattaroq bo‘lsa-da, ikkinchisi mashhurroq va Amerika jamiyatiga birinchisidan ko‘ra yaxshiroq o‘rnashgan. Uni ko‘pincha OTM so‘ziga sinonim sifatida ishlatishadi, garchi nazariy jihatdan kollejlar magistr emas, faqat kichik mutaxassis va bakalavr darajasini olishga imkon bersa-da. Tarixan kollejlarda magistratura bo‘lmagan, bu ta’lim muassasalari universitetlarga nisbatan kichikroq bo‘lgan.

Universitetlarda magistr yoki doktor darajasini olish mumkin edi. Bundan tashqari, universitetlar o‘z tarkibiga bir necha kollej va maktablarni qamrab ololgan. Bunday xususiyatga hozir ham duch kelish mumkin, masalan, Garvardda Dizayn maktabi bor, Michigan universiteti fakultetlari orasida esa Muhandislik kolleji mavjud.

AQShda “universitetga kirishni rejalashtiryapman” yoki “universitetda o‘qiyman” jumlasini kam eshitasiz. Talaba hatto Stenford yoki Yel universitetida ta’lim olayotgan bo‘lsa-da, kollejga borishini aytadi, hatto bu OTMlarni maktab (school)  deb ataydi.
Gap shundaki, tarixan universitet va kollejlar farqlangan bo‘lsa-da, AQShda ular bir xil bo‘lib qolgan, ba’zi kollejlarning fakultetlari universitetlarnikidan ko‘proq, ularning aksariyatida magistr yoki doktor darajasini olishga imkon berishi mumkin. Universitet xususiyatiga ega OTMlar esa kollej deb atalashi mumkin. Masalan, Boston kolleji yoki Vilgelm va Mariya Kolleji o‘z nomiga qaramasdan universitet hisoblanadi.

Umuman olganda, Amerika universitetlari kollejlaridan obro‘liroq yoki aksincha deyish qiyin, chunki OTMlarning reytingdagi o‘rniga ta’sir ko‘rsatuvchi bir qancha omillar bor. Bundan tashqari, turli shtatlarda turli talablar qo‘yiladi. Masalan, Nyu-Jersida kamida uchta aspirantura dasturi mavjud bo‘lgan OTM universitet deb ataladi.

Shunday ekan, ta’lim muassasasini tanlashda uning milliy reytingdagi o‘rniga qarash hamda u yoki bu fakultet qanchalik kuchli hisoblanishini tahlil qilish lozim. O‘quv dargohi kollej deb ataladimi yoki universitetmi, AQShda katta ahamiyatga ega emas.