Avgust oyida Istanbuldagi Bosh konsulxona tomonidan jazoni ijro etish muassasalari, deportatsiya markazlari, politsiya, sud idoralari va shifoxonalarga tashriflar amalga oshirilgan.

Turkiya va Bolgariyada qiyin vaziyatga tushgan o‘zbekistonliklarga konsullik-huquqiy yordami ko‘rsatilgan.

Turkiyada vafot etgan 5 nafar o‘zbekistonlik hamda Bolgariyaning Sozopol shahrida cho‘kish oqibatida halok bo‘lgan fuqarolarning jasadlarini vatanga olib kelish xarajatlari davlat hisobidan qoplab berilgan.

Shifoxonalarda davolanish jarayonida katta qarzga tushgan 12 nafar fuqarolarga chegirmalar qilinib, ularning vatanga qaytishiga amaliy yordam ko‘rsatilgan.

Turkiyada hujjatsiz qolgan 27 nafar o‘zbekistonlikka yordam berilib, zarur hujjatlar rasmiylashtirilgan.

Shuningdek, O‘zbekistonning Istanbuldagi Bosh konsulxonasi fuqarolarga quyidagilari eslatib o‘tgan:

“Turkiyada hujjatlarni tekshirish kuchaytirilgan.

Shuning uchun:

– pasport va shaxsni tasdiqlovchi hujjatlarni yoningizda olib yuring;

– mahalliy qonun-qoidalarga rioya qiling;

– favqulodda vaziyatlarda Konsulxonaga murojaat qiling”.

• Bolgariya
• Istanbul
• Konsullik
• fuqaro