Fitbol – tananing turli sohalaridagi muammolarni bartaraf etishga yordam beruvchi ajoyib vositalardan biri. Uning asosiy vazifasi – boʻgʻimlardagi charchoq hissini nari ketkazishdir. Fitbol yordamida turli mashqlarni bajarish nafaqat bolalar, balki chaqaloqlar, katta yoshli insonlar, hattoki homilador ayollar uchun ham foydali hisoblanadi.

Bugungi kunda fitbolning bir qancha – silliq yuzali, uqalash xususiyatiga ega, bolalar uchun moʻljallangan, maxsus tutqichli turlari bor.

Silliq fitbol

Fitbolning silliq turi – eng universal variant boʻlib, undan odatda homilador ayollar hamda chaqaloqlar foydalanishadi.

Bolalar fitboli

Yosh bolalar uchun moʻljallangan fitbolning yuqori qismida tutqichlar mavjud boʻladi. Ular bolalarga mashqlarni oson va toʻgʻri bajarishga yordam beradi.

Uqalash xususiyatiga ega fitbol

Bu turdagi fitbol kichik va yumshoq “tikanlar” bilan qoplangan boʻladi. Shifokorlar vestibulyar apparat kasalliklarini davolash vaqtida, jarohatlardan qayta tiklanish davrida aynan mana shunday fitboldan foydalanishni maslahat beradilar. U tanani ehtiyotkorlik bilan uqalaydi va qon aylanishini yaxshilaydi.

Maxsus tutqichli

Maxsus tutqichlarga ega boʻlgan fitbol mashgʻulotlar vaqtida tananing turli qismlaridagi mushaklar bilan ishlashga imkon beradi.