Qo‘li ochiqlik, albatta, eng yaxshi xislat. Ammo hamma narsani ham birov bilan baham ko‘rib bo‘lmaydi. Mana masalan...

Tish pastasi

Tish pastasidan surtish vaqtida tish cho‘tkasi tolalari pasta “bo‘yinchasiga” tegishi mumkin. Oqibatda cho‘tkadagi bakteriyalar tish pastasiga o‘tib qoladi. Agar tish cho‘tkasi o‘zingizniki bo‘lsa-ku unchalik qo‘rqmasa ham bo‘ladi. Ammo birovniki bo‘lsa... 

Oilada har bir insonning o‘z tish cho‘tkasi bo‘lishi lozim. Tish pastasidan surtishda ham uni tish cho‘tkasiga tekkizmaslikka harakat qiling. 

Sovun

Sovun gigiyenik vositalardan eng muhimi sanaladi. Shu sabab bir sovundan yoppasiga foydalanish tavsiya etilmaydi. Sovunda qolgan ortiqcha namlik, suv bakteriyalar ko‘payishiga sababchi bo‘ladi. Sizdan oldin sovundan kimdir foydalangan bo‘lsa-yu sovunni ortiqcha suvi bilan qo‘yib qo‘ysa, undagi kasallik qo‘zg‘atuvchilari sizning teringizga ham o‘tib qolishi mumkin. 

Antiperspirant

Terlashga qarshi vositalardan faqat bir inson foydalanishi kerak. Bu haqda boshqa gap ham bo‘lishi mumkin emas! Qizlarning bir-biridan bu kabi vositalarni olib turishlari, ishlatishlari o‘ziga begona bakteriyalarni yuqtirib olishga olib keladi.

Idishdagi krem

Idishda sotiluvchi kremlar ham borligini yaxshi bilsangiz kerak? Kremdan surtish uchun unga barmoq tiqish kerak bo‘ladi. Mana shu sababli ham bu kabi krem turlaridan faqatgina bir kishi foydalanishi joiz. Turli odamlarning qo‘l barmog‘idagi infeksiyalar teri kasalliklarini qo‘zg‘ashi mumkin. Masalan, yog‘li husnbuzarlar... Shu sabab idishdagi kremdan faqatgina maxsus qoshiqcha yordamida olib, keyin teriga surtish tavsiya etiladi. Shunda ham har bir foydalanuvchining o‘z krem qoshiqchasi bo‘lishi kerak.
  
Tirnoq olgich

Manikyurda qo‘llaniluvchi tirnoq olgichlar hammaga bir xil qo‘llanilishini bilasizmi? Tirnoqni olish vaqtida ular teri yuzasini jarohatlashi, qon chiqishi mumkinligini-chi? Qon orqali turli virus yuqtirib olishni istamasangiz, o‘z shaxsiy manikyur buyumlaringizdangina foydalaning.   

Qisqich

Teridagi tuklarni yulishga mo‘ljallangan qisqich ham har kimda o‘ziniki bo‘lishi zarur. Negaki, tuk yulish vaqtida ham teridan qon chiqishi mumkin. Qon orqali sariq kasallik, OITS kabi yuqumli kasalliklarni yuqtirib olish ehtimoli katta. Qisqichni ishlatishdan avval uni yaxshilab spirtda artish zarur.

Zirak

Do‘konda sotiluvchi ziraklarni o‘zingizga taqib ko‘rishdan avval sotuvchidan bu zirakni avval hech kim taqib ko‘rmaganligini so‘rang. Dugonangizga ham o‘z ziragingizni bera ko‘rmang. Qon orqali turli virus o‘tishi mumkinligini yuqorida aytib o‘tdik...

Quloqchin

Quloq ichiga kiritiluvchi quloqchinlar faqatgina shaxsiy bo‘lishi kerak. Aks holda uni olib turgan o‘rtog‘ingizning quloq bakteriyasini yuqtirib olishingiz mumkin.
 
Quloq tashqi yo‘lida streptokokk, stafilokokk kabi yiringli kasallik tug‘diruvchi bakteriyalar yashashi mumkin.