O‘zbekiston Markaziy banki boshqaruvi qaroriga ko‘ra, joriy yil 22-apreldan boshlab mobil bank ilovalaridan foydalanish uchun telefon raqami aynan foydalanuvchi nomiga rasmiy ro‘yxatdan o‘tkazilgan bo‘lishi shart.

Hujjatda kredit va to‘lov tashkilotlarining sayt hamda mobil ilovalarida foydalanuvchilarni ro‘yxatdan o‘tkazish tartiblari aniq belgilab berilgan. Unga ko‘ra, ro‘yxatdan o‘tish jarayonida foydalanuvchining telefon raqami uning jismoniy shaxsiy identifikatsiya raqami (JSHSHIR) bilan mos kelishi tekshiriladi.

Agar ushbu ma’lumotlar mos kelmasa, foydalanuvchiga mobil ilovada ro‘yxatdan o‘tishga ruxsat berilmaydi va bu haqda SMS orqali xabarnoma yuboriladi.

Shuningdek, bank kartasini ilovaga biriktirish jarayoni alohida tartibda – OTR-kod kiritish hamda biometrik identifikatsiyadan o‘tish orqali amalga oshiriladi. Agar telefon raqami bank kartasiga ulangan SMS-xabarnoma raqami bilan mos kelmasa, kartani ulash jarayoni to‘xtatiladi.

Faqat foydalanuvchining o‘ziga tegishli bo‘lgan (yaqin qarindoshlari bundan mustasno) bank hisobvaraqlari, kartalari va elektron hamyonlarini biriktirishga, shuningdek jismoniy shaxslar o‘rtasida naqd pulsiz pul o‘tkazmalarini amalga oshirishga yo‘l qo‘yiladi.

Yaqin qarindoshlar qatoriga ota-onalar, tug‘ishgan va o‘gay aka-ukalar hamda opa-singillar, er-xotinlar, bolalar (jumladan farzandlikka olinganlar), bobolar, buvilar, nevaralar, shuningdek er (yoki xotin)ning ota-onalari va opa-ukalari kiradi.

• Markaziy bank
• Qaror
• Telefon
• identifikatsiya
• ilova