Kecha, 14-iyun kuni Milliy matbuot markazida “Qishloq xo‘jaligi yer maydonlari va yerdan foydalanuvchilari to‘g‘risidagi ma’lumotlarni davlat ro‘yxatidan o‘tkazish tartibi va afzalliklari” mavzusida Davlat soliq qo‘mitasi huzuridagi Kadastr agentligi ishtirokida matbuot anjumani bo‘lib o‘tdi.

Anjumanda qatnashgan Xabardor.uz muxbiri Agentlik mutasaddilaridan 2020-yil 21-iyulda tizimga raqamli texnologiyalarni joriy etish bo‘yicha davlat rahbari bergan topshiriqning hozirgi kundagi ijrosi haqida so‘radi.

2020-yil 21-iyulda bo‘lib o‘tgan davlat rahbari ishtirokida kadastr sohasiga bag‘ishlab o‘tkazilgan yig‘ilishda sohaga sun’iy yo‘ldosh kanallarini ijaraga olish va signallarni qayta ishlash tizimini tashkil etishga doir ko‘rsatmalar berilgan edi.

–  Ijaraga olinmagan, shu yil olinadi va ilk bor yo‘lga qo‘yiladi. Uning o‘rniga bizda hozir aerozalyot qilinyapti, Shveysariyaning “Leca” kompaniyasidan kamera sotib olindi.  Bu kameraning narxi 890 ming AQSh dollari turadi. Hozirgi kunda biz samolyot ham sotib olmoqchimiz. Bularning yordamida biz aerotasvirlarni qo‘lga kiritishimiz mumkin bo‘ladi. Kosmosdan olingan suratlar bu qishloq xo‘jaligi yerlarining xaritasini yaratishga hamda noqonuniy qurilmalarni oldini olishga yordam beradi, – dedi Davlat soliq qo‘mitasi huzuridagi Kadastr agentligi direktori o‘rinbosari Mirsaid Mirmaqsudov.