Kuni kecha, 23-sentyabr kuni Axborot va ommaviy kommunikatsiyalar agentligi anjumanlar zalida Oʻzbekiston Respublikasi Turizmni rivojlantirish davlat qoʻmitasi rahbariyati va masʼul xodimlari hamda jurnalistlar ishtirokida matbuot anjumani boʻlib oʻtdi.

Anjumanda Oʻzbekiston Respublikasi Turizmni rivojlantirish davlat qoʻmitasi rahbari Abdulaziz Akkulov va boshqarma boshliqlari ishtirok etishdi hamda sohaning normativ asoslarini takomillashtirish yuzasidan amalga oshirilayotgan vazifalar, ichki turizmni rivojlantirish, turizm salohiyati targ‘iboti, kadrlar salohiyatini kuchaytirish kabi masalalar yuzasidan ma’lumotlar berildi. 

Tadbir davomida, mutasaddi xodimlarga O‘zbekistonga kelayotgan sayyohlar, asosan, yoshi kattalarni tashkil etishi, shuningdek, yurtimizga bir bor kelgan sayyoh ikkinchi marta qaytib kelish hollari kamdan-kam qayd etilishi yuzasidan savollar berildi.

Turizmni rivojlantirish davlat qo‘mitasi raisi maslahatchisi Behruz Hamzayev yuqoridagi savollarga javob berib, jumladan, shunday dedi:

“Fikringizga qo‘shilaman, lekin yaqinda O‘zbekistonda ilk bor o‘tkazilgan “World Influencers Congress” I Xalqaro influyenserlar kongressidan so‘ng “Amadeus” (dunyodagi barcha aviakompaniyalar ushbu dastur orqali bilet sotib oladi) dasturining hisobotiga ko‘ra, O‘zbekistonda joriy yilning sentyabriga qadar aviachiptalarni bron qilish amaliyoti o‘tgan yilga nisbatan 43 foizga oshgan. Bu ijobiy ko‘rsatkich, ammo O‘zbekistonga sayohat uchun kelish ancha qimmat. Birgina misol, Yevropadan Avstraliyaga bir haftaga sayohat qilishdan ko‘ra O‘zbekistonga sayohat qilish qimmatroqqa tushadi. Chunki milliy aviakompaniya chiptalari, mehmonxonalar – barcha-barchasida raqobat bo‘lmaganligi uchun bizda ko‘pgina xizmatlarimiz qimmat. Shu sababdan katta yoshli chet ellik sayyohlar guruh bo‘lib sayohat qilishni ma’qul ko‘radilar. Bu esa nisbatan arzonroqqa tushadi. Ya’ni, bir kishiga 1000 AQSh dollari ketsa, guruh bo‘lib sayohat qilganlar uchun, aynan shu xizmatlar kishi boshiga 700 AQSh dollaridan tushadi. Aslida, bu ham yomon segment emas”. 

Lekin hozir tendensiyalar o‘zgarmoqda. Aviakompaniya monopoliyasi olib tashlanishi yurtimizda ko‘plab avialiniyalarning joriy etilishiga va natijada aviachiptalar narxining tushishiga olib keladi, deya uning so‘zlarini keltirmoqda xabardor.uz muxbiri. 

Dildora MAMANOVA, Xabardor.uz