Dunyoga mashhur sportchi, taniqli aktyor bugun 59 yoshni qarshi oldi. Jan-Klod Vandam 1960-yilning 18-oktabrida Belgiyaning Bryussel shahrida tavallud topgan. To‘liq ismi Jan-Klod Kamil Fransua Van Varenberg.

 U nafaqat aktyor, balki rejissyor, ssenarist, bastakor va montaj ustasi sifatida ham faoliyat yuritgan, 50ga yaqin film, ko‘plab klip va reklama roliklarida suratga tushgan. 

Xo‘sh, bunday muvaffaqiyatga u qanday erishgan?

Jan-Klod Van Damm o‘z iste’dodini butun dunyoga namoyish qilish uchun 80-yillarning boshlarida Gollivudga keladi. U tezlik bilan ingliz tilini o‘rganishga harakat qiladi. O‘sha paytlarda u tirikchilik uchun to‘g‘ri kelgan mayda ishlarni qilishga majbur bo‘lgan. Masalan, pitsa yetkazib beruvchi, taksichi, haydovchi va ofitsiant sifatida ishlaydi. Bir so‘z bilan aytganda, u xorijiy mamlakatda qolish uchun qo‘lidan kelganini qiladi.
  
Keyinchalik uni taniqli sportchi va aktyor Chak Norris o‘z yonida ishlashga taklif qiladi. Chak Norris aktyorning jismoniy imkoniyatlarini sezib, uni “Yo‘qolgan” filmida suratga tushishga taklif etadi. Bu film o‘zga davlatdan kelgan musofirga butun dunyo taniydigan Jan-Klod Van Damm bo‘lishida “oltin kalit” vazifasini o‘tadi. 

 Van-Damm’ning baletga nima aloqasi bor?

Hayron qolishingiz aniq. Ammo Van Damm 16 yoshidan boshlab, naq 5 yil davomida balet maktabida o‘qigan. Uning janglardagi o‘zgacha plastikasida aynan shu mashg‘ulotlar katta rol o‘ynagan. “Balet – bu san’at, lekin shu bilan birga eng qiyin sport turlaridan biridir. Balet mashqlariga bardosh bera olgan odam boshqa har qanday sport turi bilan shug‘ullanishga o‘zida kuch topa oladi. 

 Van Damm va multfilm

Buni qarangki, aktyor ingliz tilini kuniga bir soatdan multfilm tomosha qilib o‘rgangan ekan. Bu u biladigan yagona til emas. Van Damm fransuz, ispan va nemis tillarida ham so‘zlasha oladi.

Bryussel shahrida unga atab haykal qo‘yilganida u: “Odamlar haykal yonidan o‘tganlarida, nafaqat Jan-Klod Van Dammni, balki o‘ziga ishongan oddiy odamni ko‘rishlarini xohlayman”, degandi. Bundan tashqari, unga o‘z yurti hukumati “Belgiyaning bodibilder janobi” unvonini ham bergan. 

“Universal askar”, “Vaqtni qo‘riqlash”, “Kikbokschi”, “Juft zarba” filmlari Van Damni butun dunyoga tanitgan eng sara filmlar hisoblanadi. 

Bugungi kunda ham jahon yulduzi hamon sport bilan shug‘ullanib, ortiqcha vazn yig‘maslikka harakat qiladi. Qolaversa, uni hozirgi kunda ham turli reklama va kliplarda suratga tushishga taklif qilishadi. U juda qimmat aktyorlar sirasiga kiradi. 

Nozima Rahmatova tayyorladi