Arterial gipertoniya zamonamiz odamlari orasida juda keng tarqalgan kasallik turlaridan biri. Shu sababli ham ushbu kasallikka doir uydirmalar soni koʻp ekanligidan hayratga tushmaslik mumkin. Yuqori qon bosimini davolash mumkinmi? Uni bir urinishda meʼyoriy holatga keltirib olsa boʻladimi? Buning uchun dori vositalarini qabul qilish yetarlimi yoki butun hayot tarzini oʻzgartirish talab etiladimi?

Gipertoniya – juda makkor kasallik. U bir qarashda sizni bezovta qilmaydi, ammo umr davomiyligini 10-20 yilga qisqartirib qoʻyadi. Bosh ogʻrigʻi, asabiylik, koʻngil aynishi aksariyat gipertoniklarni boshlangʻich bosqichlarda bezovta qiladi. Keyinchalik bunday holatlar xuruj boʻlmagan vaqtda ham kuzatiladi. Eng achinarlisi, gipertoniklarning atigi 40 foizigina oʻzlarida mana shu kasallikning borligidan xabardor boʻlishadi. Ularning 40 foizi esa kasallikka qarshi dori vositalarini qabul qiladi. Odamlar orasida keng tarqalgan boshqa kasalliklar kabi arterial gipertoniya haqida ham koʻplab uydirmalar kelib chiqqan.

1-uydirma. Arterial gipertoniyani davolash mumkin

Gipertoniya surunkali kasallik, uni butunlay davolash imkoni mavjud emas. Shu sababli gipertoniklar hamisha shifokor nazorati ostida boʻlishlari, kerakli dori vositalarini qabul qilib yurishlari kerak. Arterial gipertoniya insult, infarkt va buyrak faoliyati buzilishiga sabab boʻlishi mumkin. Shuningdek, yuqori qon bosimi koʻp hollarda oʻlimga ham sabab boʻladi.

2-uydirma. Agar qon bosimi meʼyoriy holatda boʻlsa, dori ichish shart emas

Arterial gipertoniyani davolash uchun doimiy ravishda dori vositalarini qabul qilib yurish kerak, ularni shifokorlar har bir bemor uchun maxsus qoʻllanma asosida tanlab berishadi. Ahvolning vaqtinchalik yaxshilanishi dori-darmon haqida unutishga sabab boʻlmasligi lozim.

3-uydirma. Arterial gipertoniya belgilari

Yuqori qon bosimining xavfli tomoni shundaki, uning ilk bosqichlarida odam oʻzini yaxshi his qilaveradi. Baʼzan koʻrish qobiliyati yomonlashishi, qoʻl-oyoqlar uvushib qolishi, nafas siqishi kabi belgilar koʻzga tashlanishi mumkin. Ammo, ular gipertoniya belgisi hisoblanmaydi, ular kasallikning rivojlanayotganidan darak beradi.

4-uydirma. Agar dori vositasi yordam bermasa, uni oʻzgartirish kerak

Bu oʻrinda har bir organizmning oʻziga xos ekanligini unutib qoʻymaslik lozim, sababi bir odam organizmi maʼlum dori vositasiga nisbatan boshqa odamdagiga nisbatan boshqacha taʼsir koʻrsatadi. Gipertoniklar dori-darmonlar bilan bir qatorda qon bosimi, tomir urushi va boshqa koʻrsatkichlar qayd etilgan kundalik yuritishlari kerak.

5-uydirma. Agar qon bosimi doimo baland boʻlsa meʼyoriy hayot tushunchasi bilan xayrlashish talab etiladi

Shifokor tavsiyalariga amal qilinganida kasallik asoratlaridan himoyalanish mumkin. Qon bosimi koʻp hollarda asab va endokrin tizimida jiddiy muammolar borligiga ham ishora qiladi. Shu sababli muolaja tayinlash uchun malakali mutaxassisga murojaat qilish tavsiya etiladi.