Sayohatchilar uchun eng qulay palla hisoblanadigan qaynoq tarovatli go‘zal yoz fasli yakuniga yetdi, lekin ko‘nglingizni cho‘ktirishga hojat yo‘q. Chunki kuz eng yorqin va eng chiroyli mavsum hisoblanadi. Uning ulug‘vorligini to‘liq his qilish uchun esa o‘ziga xos rang-barang kuzgi bo‘yoqlar mujassamlashgan maskanlarga boring. 
  
Nara. Yaponiya

Yaponiyada kuz fasli bahorda Sakura daraxti gullagan vaqtdagidan kam emas. Kuz tarovatini butun mamlakat bo‘ylab: Hokkaydo Shimoliy orolidan tortib to Janubiy viloyatlargacha bo‘lgan hududlarda ko‘rish mumkin. Yaponiyada kuz manzarasidan bahramand bo‘lish uchun eng yaxshi joylardan biri bu qadimiy Nara shahridir. Uning bepoyon xiyoboni rang-barang qizil, sariq va oltinrang barglarga to‘la.

Agava Kanyon. Kanada

“Agawa Canyon” poyezdiga chiqing va go‘zal kuz manzaralaridan bahramand bo‘ling. Poyezd Kanada va AQSh bilan chegaradosh Saul-Sent-Mari shahridan jo‘naydi. Ushbu yo‘nalish bilan mamlakatning 180 km.lik masofasi bo‘ylab yastangan tabiat go‘zalligiga guvoh bo‘lasiz. Kanyonning kuzgi manzarasi rassom Tom Tomson hamda XX asr boshida Kanadadagi eng taniqli peyzaj rassomlarini o‘z ichiga olgan “Yettilik guruh” uchun ilhom manbai bo‘lgan. Lekin bu go‘zallik uzoq vaqt saqlanib turmaydi. Ularni ko‘rmoqchi bo‘lsangiz shoshilingiz kerak. 

Din o‘rmoni. Angliya

Gloustershir grafligidagi bu qadimiy o‘rmonda bir paytlar qirollik ayonlari ovga chiqishgan. Bundan tashqari bu hududda Tyudorlar sulolasining kemalari yasalgan. Bugun mazkur joy ko‘proq tabiat qo‘ynida badiiy kitob o‘qib o‘tiruvchilarning sevimli maskaniga aylangan. Kuzda esa eman, qarag‘ay va shirin kashtan daraxtlarining rangli barglari sariq va olovranglarning ajoyib uyg‘unlashuvini hosil qiladi.

Oq tog‘lar. Nyu-Gempshir, AQSh

Nyu-Gempshirning Oq tog‘lari kuz faslining bor go‘zalligiga guvoh bo‘lish uchun butun dunyodagi eng yaxshi joylardan biri hisoblanadi. Oktyabr oyining boshlarida barglar bilan to‘lgan qirg‘oqlar va tepaliklar bo‘ylab sayr qilib, 76 metr balandlikdan oqib tushuvchi “Kumush kaskad” sharsharasini tomosha maroqli, albatta. 

Luara vodiysi. Fransiya

Kuz Fransiyadagi Luara vodiysiga borish uchun eng yaxshi palla. Issiq kunlardan keyin yashil tabiatning sariq, jigarrang va olovli ranglarga almashishi ajib manzara kasb etadi. Fransuzlarning o‘zgacha uzumzorlarida hozir ayni yig‘im-terim vaqti. Bu yerda siz haqiqiy fransuz sharobini tatib ko‘rishingiz mumkin.
  
Danenong vodiysi. Avstraliya

Avstraliyada yorqin kuz martdan may oyigacha davom etadi. Melburn yaqinidagi Dandenong milliy bog‘ida bu qisqa muddat ichida juda chiroyli manzara hosil bo‘ladi.

Bishop-Krik kanyoni. Kaliforniya, AQSh

Kaliforniyadagi Bishop-Krik kanyonida kuzgi manzaralardan zavqlanish uchun ajoyib joylar juda ko‘p. Inyo okrugidagi Syerra-Nevada tog‘larida joylashgan qoyali tepaliklar oltin barglari bilan hammani hayratga soladi.

Pitloxri, Shotlandiya

Shotlandiyaning qarag‘ay o‘rmonlari rangini o‘zgartira olmaydi. Lekin uning boshqa turdagi bargli daraxtlari Yevropadagi eng go‘zal kuz manzaralarini hosil qiladi. Tummel daryosi va Lox-Faskalli suv omborini ajratib turadigan joyda suvga tushgan rang-barang barglar jilosidan bahramand bo‘lasiz. 

Garchi kuzda ob-havo nisbatan salqin bo‘lsa-da, bu sayohat qilishni xush ko‘ruvchilarni to‘xtatib qola olmaydi. Ular har qanday sharoitda ham o‘zlari uchun yangi olamni kashf qilaverishadi.