Davlatimiz rahbarining Mo‘g‘ilistonga davlat tashrifi davom etmoqda. Bir oz avval Ulan-Batordagi Suxbaatara maydonida O‘zbekiston Respublikasi Prezidenti Shavkat Mirziyoyev va rafiqasi Ziroat Mirziyoyevani Mo‘g‘uliston prezidenti Uxnaagiyn Xurelsux va rafiqasi Luvsandorjiyn Bolorseseg tomonidan rasmiy kutib olish marosimi bo‘lib o‘tdi.

Faxriy qorovul saf tortdi, ikki davlat madhiyalari yangradi. Shundan so‘ng prezidentlar Davlat Oq harbiy bayroqqa hurmat bajo keltirdilar va faxriy qorovul yonidan o‘tdilar.

Prezidentlar ikki mamlakat delegatsiyalari, Mo‘g‘ulistondagi diplomatik missiyalar rahbarlari va xalqaro tashkilotlar vakillarini qutladilar.

Shavkat Mirziyoyev va Uxnaagiyn Xurelsux Chingisxon haykaliga hurmat bajo keltirib, Davlat saroyiga yo‘l olishdi. U yerda O‘zbekiston Prezidenti Shavkat Mirziyoyev faxriy mehmonlar kitobiga dastxat yozib qoldirdi.

Eslatib o‘tamiz, mazkur tashrif ikki mamlakat o‘rtasida diplomatik aloqalar o‘rnatilganidan so‘ng O‘zbekiston Respublikasi Prezidentining Mo‘g‘ulistonga amalga oshirgan ilk davlat tashrifi hisoblanadi.

• Mirziyoyev
• Tashrif
• mongoliya