Elektr avtomobillarini ishlab chiqaruvchi Tesla kompaniyasi yangi funksiyalar qo‘shilgan dasturiy ta’minotning yirik yangilanishini chiqardi.

Yangilanishning 10-versiyasi sotib olingan to‘liq avtopilot variantiga ega bo‘lgan avtomobillarda mavjud. Qolgan elektrokarlar bir necha kun ichida yangilash imoniyatiga ega bo‘ladi.

Tesla Theater

Tesla Teatr funksiyasi Teslaning Model S, X va 3 modellaridagi displeyda tasvirni to‘liq ekranda ko‘rish imkonini beradi. YouTube, Netflix va Hulu kabi eng mashhur video xizmatlarni qo‘llab-quvvatlaydi. Ammo siz videoni faqat avtomobil to‘xtab turganda ko‘rishingiz mumkin. Xitoylik Tesla egalari o‘zlarining mahalliy iQiyi va Tencent Video dasturlaridan foydalanish imkoniga ega bo‘ladi.

Smart Summon

Bir necha yillardan beri Tesla avtomobillarida faol foydalaniladigan "Summon" funksiyasi o‘z egalariga mobil dasturdan foydalangan holda, mashinalarini bir necha metrga yurgazish imkonini beradi. Masalan, ushbu funksiya bilan mashinani garajdan chiqarish mumkin.

Yangi "Smart Summon" funksiyasi g‘oyani qayta ishlab chiqib, hozirda o‘rnatilgan avtopilotga ega elektr avtomobilga to‘xtab turgan joyidan egasi turgan joyga burilishi, to‘siqlarni chetlab o‘tgan holda borish imkonini beradi.

"Agarda siz bir dunyo xalta bilan do‘kondan chiqsangiz yoki yosh bolangiz bilan bo‘lsangiz, bu foydalanish uchun ideal funksiya", deyiladi kompaniya taqdimotida.

"Smart Summon"dan faqatgina mashina ko‘z o‘ngingizda yoki unchalik uzoq bo‘lmagan joyda turganida (smartfonning bluetooth funksiyasi orqali) foydalanish mumkin.

Sarguzasht qidiruvchilar uchun mahsus tugma

Tesla navigatorida ikkita yangi "Men omadliman" va "Mening qornim och" tugmachalari paydo bo‘ldi. Agar siz ulardan birini bossangiz, mashina sizga tasodifiy diqqatga sazovor joylar yoki tasodifiy restoranga yo‘nalishni taqdim etadi.

Cuphead!

Tesla salonida endi Cuphead o‘yinini o‘ynash mumkin. Lekin o‘yinni 5 daqiqadan ortiq o‘ynashning imkoni yo‘q. Kamiga o‘yin juda murakkab va buning uchun haydovchi o‘yinni boshqarish moslamasini mashinaga ulashi kerak.

Karaoke

Haydash vaqtida qo‘shiq kuylashni yaxshi ko‘radiganlar uchun Tesla maxsus funksiyani taqdim etdi. Endi avtomobilni boshqarayotganda markaziy displeyda qo‘shiqlar matnini chiqarish mumkin.