Buyuk Britaniyadagi Legatium Institute 142 ta mamlakati bo‘yicha tadqiqot o‘tkazib, bu davlatlarda aholining turmush darajasi qanday ahvolda ekanini aniqladi. Institut xodimlari mamlakatlardagi iqtisodiyot, ta'lim va sog‘liqni saqlash tizimlaridagi ahvol, inson huquqlari qay darajada ta'minlangani, xavfsizlikda yashash sharoitlari, aholining ish bilan bandligi va ijtimoiy himoya qilinishi masalalarini o‘rganib, ko‘rsatkichlarni belgilab chiqishdi hamda umumiy ro‘yxatni tuzishdi.

Institut tomonidan bunday tadqiqotlar 2009 yildan beri o‘tkazib kelinadi.

Ushbu ro‘yxatning ilk o‘nligidan Norvegiya, Shveytsariya, Yangi Zelandiya, Daniya, Kanada, Shvetsiya, Avstraliya, Finlyandiya, Niderlandiya va AQSh joy egalladi.

Norvegiya

Skandinavlar har yilgidek bu safar ham (6 marta ketma-ket) birinchi o‘rinda qoldi. Bu davlat fuqarolarining 94,9 foizi o‘z kelajaklariga ishonch bilan qarashlari ma'lum bo‘lgan. 66,1 foiz aholi esa o‘z ishlarini yo‘qotishdan xavotir olmagan holda umr kechirishadi.

Eng yuqori ko‘rsatkich: aholini ijtimoiy himoyalash (1-o‘rin)

Eng past ko‘rsatkich: boshqaruv va biznes ishlari bo‘yicha (7-o‘rin)

Inflatsiya darajasi: 2,1 foiz

Shveytsariya

Shveytsariya o‘tgan yilgi natijasini takrorladi. Markaziy Yevropadagi bu davlatda iqtisodiy o‘sish va boshqaruv sohasidagi ulkan muvaffaqiyatlarga qaramasdan, ta'lim tizmi uchun qo‘yilgan past baholar birinchi o‘rinni egallashga xalaqit berdi. Lekin, ijtimoiy so‘rovnomalar o‘tkazilganida, shveysariyaliklarning 84,6 foizi ta'lim tizimidagi ahvoldan qoniqishlarini bildirishgan.

Eng yuqori ko‘rsatkich: iqtisod va boshqaruv (1-o‘rin)

Eng past ko‘rsatkich: ta'lim tizimi (21-o‘rin)

Inflatsiya darajasi: 0,2 foiz

Yangi Zelandiya

2013 yilda 5 chi bo‘lgan Yangi Zelandiya 2 pog‘ona yuqorilashga erishdi. Mamlakatdagi ishsizlik darajasi – 6,9 foiz. Aholining 96 foizi esa davlat hukumatiga ishonch bildirgan.

Eng yuqori ko‘rsatkich: so‘z erkinligi (1-o‘rin)

Eng past ko‘rsatkich: sog‘liqni saqlash tizimi (20-o‘rin)

Inflatsiya darajasi: 0,9 foiz

Daniya

Daniyaning reytingdagi natijalari bu yil yaxshilangan. Lekin ishsizlik darajasi 7,5 foizni tashkil etmoqda va ijtimoiy so‘rovnomaga ko‘ra, aholining 22,1 foizigina ishsizlikdan qo‘rqmasligini bildirgan.

Eng yuqori ko‘rsatkich: biznes imkoniyatlari (2-o‘rin)

Eng past ko‘rsatkich: iqtisod (18-o‘rin)

Inflatsiya darajasi: 0,8 foiz

Kanada

Kanada ham bu yilgi ko‘rsatkichlarini 2 o‘ringa yaxshilab, 4 chi o‘ringa chiqdi. Tahlilchilar kanadaliklarning so‘z erkinliklari yuqori darajada kafolatganligini va migrantlarga munosabat yaxshi ekanini qayd etishgan. Ammo bu erkin sharoitlar boshqa bir muamoni yuzaga keltirib chiqargan, Kanada iqtisodiga korrupsiya xavf soladi.

Eng yuqori ko‘rsatkich: ta'lim tizimi (2-o‘rin)

Eng past ko‘rsatkich: biznes imkoniyatlari (17-o‘rin)

Inflatsiya darajasi: 0,9 foiz

Shvetsiya

Shvetsiya 2013 yilgi o‘rnida qoldi – yuqorilamadi ham, pastlamadi ham. Legatium Institute vakillari bu davlatdagi iqtisod va biznes sharoitlarini a'lo darajada deb baholadi.

Eng yuqori ko‘rsatkich: biznes imkoniyatlari (1-o‘rin)

Eng past ko‘rsatkich: ta'lim tizimi (16-o‘rin)

Inflatsiya darajasi: 0,0 foiz

Avstraliya

Avstraliya bu ro‘yxatda ketma-ket ikkinchi marta 7 chi o‘rinni band etmoqda. Avstraliyadagi ta'lim tizimi darajasi juda yuqori sifatda deya qayd etilgan, shuningdek, Avstraliya hukumatining chet-elliklarga keng himmatli ekani ham e'tirof etilgan. Biroq shu bag‘rikenglik avstraliyaliklarning u darajada xavfsiz yashay olmasliklariga ham sabab bo‘ladi.

Eng yuqori ko‘rsatkich: ta'lim tizimi (1-o‘rin)

Eng past ko‘rsatkich: aholi xavfsizligi (16-o‘rin)

Inflatsiya darajasi: 2,4 foiz

Finlyandiya

Ro‘yxatdagi uchinchi Skandinaviya mamlakati 8 chi o‘rinni egalladi. Finlyandiya iqtisodi u qadar rivojlanmagan bo‘lsa-da, finlandlar mamlakatdagi tartibli boshqaruv va siyosiy-harbiy nizolar o‘choqlaridan olisda bo‘lgani uchun o‘zlarini baxtli his qila oladilar. Ishsizlik muhim muammolardan biri, atigi 17 foiz aholigina ishidan ayrilib qolmaslik haqida qayg‘urmay umrguzaronlik qila oladi.

Eng yuqori ko‘rsatkich: aholi xavfsizligi (3-o‘rin)

Eng past ko‘rsatkich: iqtisod sohasi (26-o‘rin)

Inflatsiya darajasi: 1,5 foiz

Niderlandiya

Gollandlar har yili kuchli o‘nlikning quyirog‘idan o‘rin egallab kelishadi. Tahlilchilar bu davladdagi iqtisodiy sharoitlarni o‘tgan yilgi kabi past ko‘rsatkichda ekanini qayd etishgan. Lekin, ta'lim va sog‘liqni saqlash tizimidagi ahvol juda yaxshi baholangan.

Eng yuqori ko‘rsatkich: ta'lim tizimi (4-o‘rin)

Eng past ko‘rsatkich: iqtisod sohasi (25-o‘rin)

Inflatsiya darajasi: 2,5 foiz

AQSh

AQSh o‘tgan yili o‘zining bu o‘nlikdagi o‘rnini Lyuksemburgga bo‘shatib bergan edi. Bu yil mamlakatdagi ahvol biroz yaxshilandi. Ayniqsa, sog‘liqni saqlash tizimida ko‘plab islohotlar olib borilgan. Lekin, Qo‘shma Shtatlar endi "so‘z erkinliklari mamlakati" emas. Bu boradagi ko‘rsatkich bo‘yicha 21 chi o‘rinda qayd etilishgan. Hatto Urugvay va Kosta-Rika kabi sobiq diktatura rejimida yashagan davlatlar ham bu borada AQShdan yaxshiroq ko‘rsatkichga ega. Amerikaliklarning eng yomon ko‘rsatkichi esa mamlakatda avj olgan jinoyatchilik va tashqi urushlar tufayli aholining o‘zini xavfsiz hiz qila olmasligi bilan bog‘liq.

Eng yuqori ko‘rsatkich: sog‘liqni saqlash tizimi (1-o‘rin)

Eng past ko‘rsatkich: aholi xavfsizligi (31-o‘rin)

Inflatsiya darajasi: 1,5 foiz

O‘zbekiston fuqarolarining ijtimoiy himoyalanganlik darajasi tadqiqotchilar tomonidan dunyo bo‘yicha eng yaxshi 16 chi ko‘rsatkichdan biri sifatida baholangan. Umumiy ro‘yxatda esa, yurtimiz 57 chi o‘rinda qayd etilgan. Bu borada O‘zbekiston MDH ga a'zo mamlakatlar orasida Belarus (53) va Qozog‘iston (55)dan keyingi 3 chi bo‘ldi. Shuningdek, Ukraina (63), Rossiya (68), Qirg‘iziston (74), Ozarbayjon (79), Gruziya (80), Turkiya (86), Tojikiston (94) va Armaniston (95) davlatlarini uchratishimiz mumkin quyiroq o‘rinlarda.