“Shavkat Mirziyoyevning Xitoy Xalq Respublikasiga rasmiy tashrifining tadbirlarga boy dasturi 3-sentyabr kuni yakuniga yetdi”, – deb xabar berdi Prezident matbuot xizmati.

Prezident 31-avgust kuni rafiqasi bilan birga Tyanszin shahridagi “Meyszyan” kongress markazida Shanxay hamkorlik tashkiloti sammitining norasmiy tadbirlarida qatnashdi. O‘zbekiston rahbari 1-sentyabr kuni ShHT Davlat rahbarlari kengashining navbatdagi yig‘ilishi va “ShHT plyus” formatidagi uchrashuvda qatnashib, ko‘p tomonlama hamkorlikni yanada mustahkamlash hamda tashkilot faoliyatini takomillashtirish bo‘yicha qator tashabbuslarni ilgari surdi.

2-sentyabr kuni Pekin shahrida Xitoy Xalq Respublikasi raisi Si Szinpin bilan rasmiy delegatsiyalar ishtirokida muzokaralar bo‘lib o‘tdi. Uchrashuv yakunida amaliy hamkorlikning ustuvor yo‘nalishlari bo‘yicha ikki tomonlama hujjatlarning salmoqli to‘plami imzolandi.

Shuningdek, Shavkat Mirziyoyev Rossiya prezidenti Vladimir Putin bilan uchrashib, ikki tomonlama hamkorlikning dolzarb masalalarini muhokama qildi. Davlat rahbari Xitoy bosh vaziri Li Syan, xorijiy delegatsiyalar rahbarlari va ishbilarmon doiralar vakillari bilan ham samarali uchrashuvlar o‘tkazdi.

O‘zbekiston prezidenti 3-sentyabr kuni Pekin shahrida Ikkinchi jahon urushi yakunlanganining 80-yilligi munosabati bilan o‘tkazilgan G‘alaba paradida ishtirok etdi.

Tashrif tadbirlari yakunlangach, davlat rahbari Toshkentga jo‘nab ketgan.

• Shavkat Mirziyoyev
• Tashrif
• Xitoy