Oyoq kiyim solinadigan qutini biz ko‘pincha joy egallamasligi uchun tashlab yuboramiz. Gohida ular shunchalik qattiq va mustahkam bo‘ladiki, tashlab yuborishga ko‘zingiz qiymaydi. Axir ulardan ajoyib buyumlar yasash mumkin-ku. Biroz ijodkorlik qobiliyatingizni ishga solib, oddiy karton qutisidan o‘zingizga asqatadigan va ko‘zingizni quvnatadigan buyumlar yasab olishingiz mumkin. 

1. Mayda-chuydalar solib qo‘yiladigan quti
Juda ajoyib qaror. Mayda buyumlarni solib qo‘yish uchun ortiqcha pul sarflagandan ko‘ra, uni oyoq kiyim qutisidan yasab qo‘yavering. Qutiga chiroyli matoni yelimlab chiqing. Ustiga bitta bant qo‘ndirsangiz, ajoyib pardoz qutisi hosil bo‘ladi. Qutiga gulqog‘oz ham yopishtirish mumkin. Qolganiga tasavvuringizni ishga soling. 

2. Dekorativ devor polkalari 
Agar sizda oyoq kiyim qutilari yig‘ilib qolgan bo‘lsa, ulardan chiroyli dekorativ polkalar yasash mumkin. Buning uchun bir nechta quti, aerozol bo‘yoq, gulqog‘oz, qaychi, yelim, otvyortka va ikkita vint kerak bo‘ladi. Agar chiroyli qilib terib chiqsangiz, uyingiz o‘zgacha chiroy ochadi.

3. Kartondan kitob javoni
Bolalarning darsligi terib qo‘yiladigan quti-shkaflar ko‘rgan ko‘zni quvnatishi aniq. Uni devorga o‘rnatish, yoki stol ustiga joylashtirish ham mumkin. Biroz dekorativ vositalar qo‘shilsa, uy bezagiga ham aylanadi.

4. Katta qalamdon
Kansyelyariya mahsulotlari: qalam, ruchka, chizg‘ich, flomaster, markerlar bu qalamdonga bemalol joylashadi. Uning tashqi ko‘rinishini o‘zingiz istagandek bezashingiz mumkin. Ichiga esa temir banka joylashtiring.

5. Qo‘g‘irchoqlar uchun uycha
Agar qizalog‘ingiz bor bo‘lsa, oyoq kiyim qutisidan qo‘g‘irchoq uchun uycha yasash ham mumkin. Ozgina fantaziyangizni ishga solib, kiyim javon hamda karavot ham yaratish mumkin. Axir qutilarning uzunchoq shakllilari ham bor-ku.

6. Taqinchoqlar uchun quticha
Serhashamlikni xush ko‘radiganlar qutini baxmal bilan o‘rab, ajoyib shkatulka hosil qilishlari mumkin. Qora barxat yuzada taqinchoqlar juda chiroyli ko‘rinadi. 

7. Vannaxona uchun dekor
Oyoq kiyim qutisiga paxtali mato yoki jgut o‘rab, ichiga paket solib qo‘ying. Kir bo‘lgan kiyim, sovun yoki sochiqlarni shunda saqlash mumkin. 

8. Mehmonxona uchun bezak
Bu borada dizaynerning maslahatini olish muhim. Bir nechta oyoq kiyimi qutisi qopqog‘ini olib, tasavvuringizni ishga soling. Mato va gulqog‘ozlardan tashqari barg va patlar, rangli tosh, folga, chig‘anoq va shu kabi vositalardan foydalanib bezash ham mumkin.

9. Mini proyektor
Do‘stlaringizni hayron qoldirishni istaysizmi? Shunchaki quti yonidan dumaloq teshik ochib, unga linzani joylashtiring. Bir tomoni yassi linza. Linzaning to‘g‘risiga smartfonni qo‘yib, filmni yoqing. So‘ng popkornni olib, bemalol filmdan zavqlanish mumkin.

Oyoq kiyim qutisiga quyidagi buyumlarni joylash mumkin:

• Tikish anjomlari;
• o‘yinchoqlar;
• tirnoq uchun laklar;
• asbob-uskunalar;
• urug‘lar;
• ziravorlar;
• eski fotolar;
• zaryadkalar;
• taqinchoqlar;
• mato bo‘laklari.