Kamharakatlilik, kompyuter qarshisida soatlab o‘tirish ertami-kechmi salomatlikka bolta uradi. Nima ham qilardik, ishimiz shu-da!, deyish ham noto‘g‘ri. Bu holatni chetlab o‘tish uchun ovqatlanish ratsioniga biroz o‘zgartirish kiritishingizga to‘g‘ri keladi. Bu borada AdMe.ru sayti idorada ko‘p o‘tirish davomida yuzaga keluvchi kasalliklarga qarshi foydali bo‘lgan besh mahsulot ro‘yxatini taqdim etadi.

Ko‘zlar salomatligi uchun

Kompyuter qarshisida soatlab o‘tirish ko‘zning ko‘rish qobiliyatiga salbiy ta’sir qilishi ko‘p bora aytilgan. Ammo idora, hujjat ishlarini ham kompyutersiz tasavvur qilib bo‘lmaydi. Ko‘zlar salomatligini saqlash uchun  har kuni tarkibi omega-3, lyutein, ruh va A,C,E vitaminiga boy bo‘lgan mahsulotlar (ko‘katlar, tuxum, sitrus va rezavor mevalar, yong‘oq, yog‘li baliq turlari)ni ko‘proq iste’mol qilish tavsiya etiladi.

Immunitetni kuchaytirish uchun

Bir xonada ko‘pchilik bo‘lib uzoq vaqt o‘tirish kasallik chaqiruvchi bakteriya va viruslar uchun ideal muhit hisoblanadi. Bu holatda ularning bir odamdan ikkinchisiga tez tarqalishining oldini olish choralarini ko‘rmoqlik lozim. Eng avvalo, immunitetni mustahkamlash zarur. Bu borada sizga sitrus mevalari, bulg‘or qalampiri, brokkoli, sarimsoqpiyoz, zanjabil, kivining yordami tegishi aniq.

Moddalar almashinuvini tezlashtirish uchun

Idora xodimlari uchun moddalar almashinuvining me’yoriyligi juda muhim. Doimiy ravishda bir yerda qimirlamay, harakatsiz o‘tirish moddalar almashinuvining sustlashishiga sabab bo‘ladi. Quyidagi mahsulotlar moddalar almashinuvini yaxshilab, sizni bir tonusda saqlaydi:
•  dengiz karami;
•  qahva;
•  choy;
•  ziravorlar (zanjabil, qora murch);
•  dukkakli mahsulotlar;
•  tovuq go‘shti;

Miyaga darmon mahsulotlar

To‘g‘ri ovqatlanish faqat tana uchun emas, bosh miya uchun ham ahamiyatli. Bu narsa, ayniqsa, aqliy faoliyat bilan shug‘ullanuvchilar uchun juda muhim. Ovqatlanish tarkibiga yog‘li baliq, yong‘oq, boshoqli mahsulotlar, anor, qora shokolad kabilardan ko‘proq kiritilsa,  miya o‘z sohibidan minnatdor bo‘ladi.

Ichaklar uchun

Amerikalik mutaxassislarning tadqiqotlariga ko‘ra, ko‘p o‘tirish bilan bog‘liq faoliyat yo‘g‘on ichaklar saratonining xavfini oshirishi mumkin. Brokkoli, ismaloq, sitrus mevalari, rezavor mevalar va boshoqli mahsulotlar ichaklarni saraton kasalliklaridan saqlaydi. Qizil go‘sht va sosiska, kolbasa kabi go‘sht mahsulotlarini esa ovqat tarkibidan chetlashtirish lozim.