Bugun Toshkent shahrida “Umid” jamg‘armasi bitiruvchilarining “Yangilanayotgan O‘zbekistonga yangi avlod kadrlari” mavzusidagi birinchi xalqaro konferensiyasi bo‘lib o‘tdi. Bu haqda Adliya vazirligi matbuot xizmati Xabardor.uz’ga ma’lum qildi. 

Tadbirda 300 nafar sobiq “Umid” jamg‘armasi stipendiyalari sovrindorlari, shu jumladan, 90 dan ortiq xorijda istiqomat qilayotgan, zamonaviy bilim va qimmatli tajribaga ega bo‘lgan vatandoshlarimizning ishtirok etishmoqda. 

Konferensiyaning birinchi qismida “Umid” jamg‘armasi orqali xorijda tahsil olib, hozirda rahbar lavozimlarida faoliyat yuritib kelayotgan vatandoshlarimiz chiqish qildi. Xususan, O‘zbekiston Respublikasi Prezidenti maslahatchisi Sherzod Kudbiyev, Adliya vaziri Ruslan Davletov, Xalq ta’limi vaziri Sherzod Shermatov, Investitsiyalar va tashqi savdo vaziri Sardor Umurzakov, Innovatsion rivojlanish vaziri Ibrohim Abdurahmonov, Qishloq xo‘jaligi vaziri Jamshid Xodjayev xorijdagi o‘qishlari va faoliyatlari, O‘zbekistonda erishgan yutuqlari, hozirda amalga oshirayotgan ishlari to‘g‘risida so‘zladi.

Ma’lumot uchun: O‘zbekiston Respublikasi Prezidenti farmoniga asosan 1997-yil 7-yanvarda iste’dodli yigit-qizlarning chet elda ta’lim olishlarini qo‘llab-quvvatlash maqsadida “Umid” jamg‘armasi tuzilgan edi.

Xabardor.uz