O‘zbekiston kasaba uyushmalari federatsiyasi tomonidan qonun hujjatlariga kiritilgan o‘zgartirishlar va a’zolik tashkilotlarining takliflari asosida 2020-yil uchun jamoa shartnomasining yangilangan Umumiy maketi ishlab chiqildi.

Norma’ning yozishicha, o‘tgan yil 6-dekabrdagi “Kasaba uyushmalari to‘g‘risida”gi Qonunga asosan qator o‘zgartirishlar kiritilgan. Ular quyidagilarga taaluqlidir:

kasaba uyushmalari vakillari o‘z ustav majburiyatlarini bajarishlari uchun ish joylariga hech bir to‘siqlarsiz kelishiga;

kasaba uyushmalarining texnik jihatdan tartibga solish sohasidagi normativ-huquqiy hujjatlar talablariga rioya etilishi yuzasidan ish joylarini jamoatchilik nazoratidan o‘tkazish huquqiga;

xodimlarning yozma arizalari asosida ish haqidan kamida 1 foiz miqdoridagi kasaba uyushmasi a’zolik badallari buxgalteriya orqali ushlab qolinishining ish beruvchi tomonidan kafolatlanishiga;

asosiy ishidan ozod qilinmagan mehnatkashlar vakillariga mehnat jamoasining manfaatlarini ko‘zlab,  jamoatchilik vazifalarini bajarishi uchun har haftalik ish vaqtining 30 foizdan kam bo‘lmagan vaqt berilishi;

kasaba uyushmalarining jamoa muzokalarini yuritish, xodimlarning manfaatlarini ko‘zlagan holda ularning nomidan jamoa shartnomalarini tuzish, shuningdek uning bajarilishi ustidan jamoatchilik nazoratini amalga oshirishga bo‘lgan ustun huquqlariga.

Bunga Vazirlar Mahkamasining 2019-yil 6-sentabrdagi “Mehnat bozorida mehnat munosabatlarini tartibga solishga doir qo‘shimcha chora-tadbirlar to‘g‘risida”gi 743-son qaroridan kelib chiqqan holda quyidagi normalar kiritildi:

-  tabiiy-iqlim sharoitlari og‘ir va noqulay bo‘lgan joylarda ishlaganlik uchun xodimlarga har yili beriladigan qo‘shimcha ta’tillar taqdim etish va ustama haq to‘lash;

-  ko‘chma va qatnash tusidagi ishlar uchun ustamalar;

-  ishlarning ayrim texnologik turlari, ishlab chiqarishlar va  iqtisodiy faoliyat turlari bo‘yicha ishchilarning tarif stavkalarini oshirishning tarmoq koeffisentlari.
 
Ijtimoiy sug‘urta va ijtimoiy himoya masalalari bo‘limida ilk marta quyidagilar nazarda tutilgan:

-  qaramog‘ida nogiron bolasi bo‘lgan xodimlarga moddiy yordam ko‘rsatish;

-  soha kasaba uyushmalari tomonidan tashkil etilgan sport tadbirlarida ish haqi saqlangan holda ishtirok etish uchun xodimlarni ishdan ozod etish;

-  doimiy turar joyga ega bo‘lmagan xodimlarga turar joy ijarasi xarajatlari uchun kompensatsiya berish.
 
Qolaversa, maketda mehnat munosabatlaridagi gender jihatlarni to‘liq hisobga olish maqsadida “Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi Qonunga muvofiq quyidagi kafolatlarga rioya etilishini hamda imtiyozlar berilishini ta’minlash nazarda tutilgan:

-  xotin-qizlar va erkaklar uchun teng huquq hamda imkoniyatlarni ta’minlash majburiyatlarini korxonaning va uning tarkibiy bo‘linmalarining vakolatli shaxsi zimmasiga yuklatish;

-  ishga qabul qilish va xizmat bo‘yicha ko‘tarishda xotin-qizlar va erkaklar uchun teng huquq hamda imkoniyatlarni yaratish;

-  xotin-qizlar va erkaklar mehnatiga haq to‘lashda notenglikni bartaraf etish.

Shuningdek, Xalqaro mehnat tashkilotining “Bir xil qiymatga ega bo‘lgan mehnat uchun erkaklar va xotin-qizlarni teng rag‘batlantirish to‘g‘risida”gi 100-son Konvensiyasiga muvofiq maketda bir xildagi, biroq turli sharoitlarda, turli qobiliyat va ko‘nikmalardan foydalangan holda bajarilgan ishlar uchun erkaklar va ayollarga teng haq to‘lash nazarda tutilgan.