Joriy yilning 22-aprel kuni investitsiyalar, sanoat va savdo vaziri Laziz Qudratovning Turkiyaning O‘zbekistondagi Favqulodda va Muxtor elchisi Ufuk Ulutash bilan uchrashuvi bo‘lib o‘tdi.

Uchrashuv davomida qayd etilishicha, so‘nggi besh yil ichida O‘zbekiston va Turkiya o‘rtasidagi tovar ayirboshlash hajmi 40 foizga oshdi, mamlakatda turk kapitali bo‘lgan korxonalar soni esa qariyb ikki mingga yetdi.

Shu bilan birga, mintaqaviy hamkorlik darajasi va har ikki mamlakat iqtisodiyotining salohiyati savdo-iqtisodiy va investitsion hamkorlikni yanada rivojlantirish uchun foydalanilmagan muhim imkoniyatlarni ta’kidlaydi.

Shularni inobatga olgan holda, tomonlar qo‘shma choralar ko‘rishga, shu jumladan imtiyozli savdo shartnomasi doirasida mahsulot turlarini kengaytirishga kelishib oldilar. Shuningdek, kelgusi yillarda o‘zaro savdo hajmini 5 milliard dollargacha oshirish maqsadida muvofiqlikni baholash bo‘yicha shartnoma imzolash to‘g‘risida kelishuvga erishildi.

O‘zbekistondagi islohotlarni baholab, elchi Turkiya mamlakatda investorlar uchun noyob sharoit va imkoniyatlar yaratishga qaratilgan harakatlarni doimiy ravishda qo‘llab-quvvatlayotganini ta’kidladi. Shu nuqtayi nazardan, investitsiya hamkorligini mustahkamlash va turk investorlarini jalb qilish uchun mavjud bo‘lgan barcha sa’y-harakatlarni faol ravishda safarbar etishga tayyorlik bildirildi.

Uchrashuv yakunida ikki mamlakat o‘rtasidagi har tomonlama strategik sheriklikni yanada faollashtirish bo‘yicha aniq yo‘nalishlar belgilandi, bu yil O‘zbekistonga rejalashtirilgan oliy va yuqori darajadagi tashriflarni birgalikda ishlash va puxta tayyorlash, shuningdek, yuzaga kelayotgan masalalarni tezkor hal etish uchun bevosita hamkorlik mexanizmi ishlab chiqildi.

• O‘zbekiston
• Turkiya