O‘zbekistonning Kanadadagi elchisi (qarorgohi Vashingtonda, -tahr.) Javlon Vahobov Kanada Tashqi ishlar vazirligi mas’uli bilan muzokara o‘tkazdi.

“Dunyo” AAning xabar berishicha, Kanada TIV Sharqiy Yevropa va Yevroosiyo byurosi bosh direktori Xaydi Kus bilan bo‘lib o‘tgan uchrashuvda Kanada O‘zbekiston bilan oliy va yuqori darajadagi siyosiy aloqalarni faollashtirishdan manfaatdor ekani qayd etilgan.

Shu bilan birga Kanada Tashqi ishlar vazirligi vakili mamlakatlar o‘rtasida har yili siyosiy maslahatlashuvlar amaliyotini davom ettirish, shuningdek, siyosiy muloqot vakillarini ko‘paytirish va turli darajadagi almashinuvlarni faollashtirish muhimligini ta’kidladi. U 2022-yilda Toshkent shahrida siyosiy maslahatlashuvlarning navbatdagi 9-raundini o‘tkazish uchun Kanada delegatsiyasining O‘zbekistonga tashrifini tashkil etishga tayyorligini bildirdi.

Shuningdek, Kanada tomoni O‘zbekiston ustuvor hamkor davlatlar qatoriga kiritilgani, bu yerda Kanada viza markazini ochish rejalashtirilayotganini ta’kidlagan.

Bu to‘g‘ridagi tegishli qaror dunyoda epidemiologik vaziyat barqarorlashishi bilan qabul qilinishi haqida xabar berildi.