“Ijtimoiy tarmoqlarda “Metroda kassa xodimlari yoppasiga ishdan bo‘shatiladi” sarlavhasi ostidagi xabar tarqalmoqda.

Holat yuzasidan “Toshkent metropoliteni” DUK quyidagilarni ma’lum qiladi:

Barchaga ma’lumki Toshkent metropolitenida to‘lovni amalga oshirish avtomatlashtirilgan tizimda olib boriladi. So‘nggi vaqtlarda yo‘lovchilar tomonidan bir martalik chiptalarga bo‘lgan talab keskin kamayib ketdi. Avval xabar berganimizdek, ayrim bekatlarning bittadan vestibyullaridagi kassalar yopilib, uning o‘rniga avtomatlashtirilgan bankomatlar sinov tariqasida o‘rnatildi.

Shuningdek, yo‘l haqini undirishning shaffofligini ta’minlash maqsadida ATTO kompaniyasi tomonidan jamoat transportlarida hamda Toshkent metropoliteni bekatlarida  quyidagi to‘lov tizimlari joriy etilgan: ATTO transport kartalari;

Uzcard Duo hamda Humo bank kartalari;

Visa va MasterCard xalqaro bank kartalari;

Virtual transport kartalari;

Mobil ilovalar orqali QR to‘lovlar;

FacePay to‘lov tizimi;

PalmPay to‘lov tizimi.

Bugungi kunga kelib, metropolitenning 23 bekatida yo‘l haqini naqd pulda to‘lovni amalga oshirmoqchi bo‘lgan fuqarolarga 24 ta QR-kodli chipta chiqarib beruvchi infokiosklar o‘rnatilgan. Bir marotabalik QR-kodli chiptaning narxi metropoliten kassalarida ham, infokiosklarda ham 3 000 so‘m etib belgilangan bo‘lib, agar yo‘lovchi tomonidan 5 ming, 10 ming yoki undan yuqori bo‘lgan kupyuralar kiritilganda, qolgan mablag‘ fuqaroning mobil raqamining hisob raqamiga qaytim sifatida tashlab beriladi. Shuni alohida ta’kidlash lozimki, joriy yilning yakuniga qadar metropolitenning barcha bekatlariga 200 ta infokiosklar o‘rnatilishi rejalashtirilgan.

Metropolitenda avtomatlashtirilgan tizim o‘rnatilishi sababli, qisqarishga tushgan xodimlar uchun belgilangan tartibda to‘rt oylik lavozim ish haqqi miqdorida kompensatsiya va nafaqalar to‘lab beriladi. Bundan tashqari, lavozimi qisqartirilayotgan xodimlarni kelgusida ish bilan ta’minlash maqsadida buxgalteriya, tikuvchilik, qandolatchilik kabi yo‘nalishlardagi kurslarida o‘qishi uchun xarajatlar “Toshkent metropoliteni” DUK tomonidan to‘lab beriladi.

Yuqoridagilardan kelib chiqib OAV vakillaridan asoslanmagan va yolg‘on ma’lumotlarni tarqatmaslikni so‘rab qolamiz. Hamda buning uchun Ma’muriy javobgarlik to‘g‘risidagi kodeksning 202²-moddasi “Yolg‘on axborot tarqatish”, shuningdek, Jinoiy kodeksning 244⁶-moddasi “Yolg‘on axborot tarqatish” bo‘yicha javobgarlik mavjudligini eslatib o‘tamiz” - deyiladi xabarda.

• Ish
• Metro
• Metropoliten
• To'lov