Raqobat qo‘mitasi savdo, kommunal xizmatlar va ijtimoiy sohalarda iste’molchilarning murojaatlarini ijobiy hal etmoqda.

Murojaatlar yechimi hududlar kesimida

Qashqadaryo viloyati

Hududiy boshqarmaga Yakkabog‘ tumani fuqarosi O‘.Sh. sotib olingan muzlatkichi nosoz chiqqanidan murojaat qilgan. Masala iste’molchi ishtirokida o‘rganilib, tovar bir necha bor ta’mirlanganiga qaramay, qayta-qayta ishdan chiqqanligi aniqlandi. Natijada, “Iste’molchilarning huquqlarini himoya qilish to‘g‘risida”gi Qonunning 13-moddasiga muvofiq, do‘kon tomonidan iste’molchiga yangi sifatli muzlatkichga almashtirib berilishi ta’minlandi.

Navoiy viloyati

Hududiy boshqarma Nurota tumanida yashovchi fuqaro B.A. “Uzum nasiya” ilovasi orqali bo‘lib to‘lash imkoniyati bilan xarid qilgan konditsioneri ishlamagani bo‘yicha qilgan murojaatini o‘rganib chiqdi.

Natijada, “SHAFFOF MOLIYA” MCHJ bilan tuzilgan shartnoma bekor qilindi va B.A.ga to‘langan boshlang‘ich to‘lov qaytarilishi ta’minlandi.

Namangan viloyati

Hududiy boshqarma Pop tumanida yashovchi G.R. Xalq bankidan 18 foizli kredit asosida “Sherzod Trend” xususiy firmasidan tikuv mashinasi olish uchun shartnoma tuzgani, biroq ta’minotchi mazkur tikuv mashinasini turli sabablar bilan yetkazib bermayotgani yuzasidan yuborgan murojaatini o‘rganib chiqdi.

Natijada, “Sherzod Trend” xususiy firmasi tomonidan fuqaroga tikuv mashinasi yetkazib berishi ta’minlandi.

Jizzax viloyati

Hududiy boshqarma Paxtakor tumanida istiqomat qiluvchi B.S. “Badavlat ayol” loyihasi doirasida “Uzum nasiya” platformasi orqali tuzilgan shartnomani psixologik trening kutilganidek bo‘lmaganligi sababli bekor qilish uchun murojaat qildi. O‘rganish natijasida 1 176 000 so‘mlik shartnoma bekor qilinishi ta’minlandi.

Farg‘ona viloyati

Hududiy boshqarmaga Rishton tumanida istiqomat qiluvchi Q.M. chiqindi tashish xizmatidan 1 080 000 so‘m qarz qo‘shib hisoblangani haqida murojaat qildi. O‘rganish natijasida “Agro Rishton ta’mir servis” MCHJ tomonidan qilingan qayta hisob-kitoblar orqali fuqaroga hisoblangan 923 320 so‘m asossiz qarzdorlik olib tashlanishi ta’minlandi.

Andijon viloyati

Hududiy boshqarma Andijon tumanida istiqomat qiluvchi N.T. “Iman halol investments” MCHJ faoliyatidan noroziligini bildirgan murojaatini o‘rganib chiqdi.

O‘rganishlar natijasida tizim nosozligidagi kamchiliklar bartaraf etildi hamda 1 900 000 so‘m kredit puli iste’molchining kredit hisobiga qaytarilishi ta’minlandi.

• Iste’molchi
• korxona va tashkilotlar
• raqobat
• savdo