“Биз олдимизга юксак марраларни қўйиб, Янги Ўзбекистонни барпо этиш йўлида астойдил меҳнат қиляпмиз, янгиликлар яратяпмиз ва натижаларга эришяпмиз.

Вилоятни қандай оғир шароитлардан олиб чиққанимизни, Жиззахнинг ҳар бир туманида бўлаётган катта-катта ўзгаришларни, одамларнинг хурсандчилигини кўриб, жуда қувонаман ва фахрланаман”, – деди давлат раҳбари.

Ўтган даврда Жиззах вилояти республикадаги саноати энг тез ўсаётган ҳудудга айланди. Саккиз йилда 6,5 миллиард долларлик инвестиция лойиҳалари ишга тушган бўлса, шунинг 45 фоизи саноат ҳиссасига тўғри келади.

Масалан, Шароф Рашидов, Ғаллаорол, Фориш, Зомин туманлари ва Жиззах шаҳрида 2,3 миллиард долларлик 560 та лойиҳа ишга тушди. Бугунги кунда ушбу туманлар вилоят саноатининг 70 фоизини таъминламоқда.

“Илгари автомобилсозлик деганда ҳамма фақат Асакани тушунарди. Ҳамкорларимиз билан Жиззахда ҳам йилига 175 минг автомобиль ишлаб чиқариш қувватлари яратилди”, – деди Президент.

Жиззах политехника институтининг Муҳандислик мактаби очилди. Бу ерда ҳар йили 300 нафар вилоят ёшлари дуал таълим асосида замонавий муҳандис бўлиб чиқади.

Ушбу институт Венгриянинг машҳур Абуда университети бошқарувига берилиб, унда нафақат автосаноат учун, балки электротехника, транспорт, қурилиш ва қурилиш материаллари, қишлоқ хўжалигида муҳандислар, сунъий интеллект бўйича мутахассислар тайёрлаш ҳам йўлга қўйилиши таъкидланди.

Қисқа фурсатда Зомин, Фориш, Арнасой туманлари ва Жиззах шаҳрида 2 миллиард долларлик 500 дан зиёд туризм ва сервис объектлари иш бошлади. Арнасой ва Зоминда 300 миллион доллар ҳисобига 12 ой давомида тўлиқ ишлайдиган курорт зоналари ишга тушгани, уларда аэропортлар барпо этилгани натижасида Жиззах энг жозибадор туристик маршрутлардан бирига айланди.

Саккиз йил олдин Жиззахдаги иш ўринларининг 42 фоизи қишлоқ хўжалигига тўғри келган бўлса, бугун 310 мингга яқин вилоят аҳолиси саноат ва сервис соҳаларидаги юқори даромадли ишлар билан банд.

• Жиззах
• Президент
• Ташриф