“АҚШнинг Филаделфия шаҳрида ўзбек диаспораси вакиллари бўлган ишбилармон аёллар учрашуви бўлиб ўтди”, – деб хабар бермоқда “Дунё” агентлиги.

Тадбир, “Ватан” жамияти ҳамда Ўзбекистоннинг Ню-Ёркдаги Бош консулхонаси ҳамкорлигида ташкил этилган.

Анжуман самимий ва конструктив руҳда ўтиб, тадбиркорлик, жамоат ишлари ва ижтимоий соҳаларда фаолият юритаётган диаспора вакилларини бирлаштирган. Иштирокчилар аёллар тадбиркорлигини ривожлантириш, хотин-қизлар бандлигини таъминлаш ҳамда диаспора ҳамжамиятида ўзаро ҳамкорликни мустаҳкамлаш масалаларини муҳокама қилишган.

Учрашув якунлари бўйича ўзаро ҳамкорликни янада кенгайтириш, жумладан, “Ватан” жамияти кўмагида Аёллар кенгашини ташкил этиш, хотин-қизлар иштирокида қўшма лойиҳаларни йўлга қўйиш ҳамда уларнинг ижтимоий-сиёсий фаоллигини ошириш бўйича келишувга эришилган. Бундан ташқари, минтақада истиқомат қилаётган ватандош аёлларга ҳуқуқий ёрдам кўрсатиш учун ихтисослаштирилган маслаҳат марказини ташкил этиш ташаббуси қўллаб-қувватланган.

• АҚШ
• Аёллар