Жиноят ишлари бўйича Қува тумани судида 28 ноябрь куни Фурқат тумани ИИБ собиқ бошлиғи Акмал Хўжаев ва унинг биринчи ўринбосари Жасур Расулов иши бўйича суд ҳукми ўқилди. Бу ҳақда Фарғона вилояти судлари матбуот хизмати хабар бермоқда.

Акмал Хўжаев (1986 йилда туғилган) ва Жасур Расулов (1991 йилда туғилган) Жиноят кодексининг қуйидаги моддаларида назарда тутилган жиноятларни содир этганликда айбли деб топилди:

– 141−3-моддаси 2-қисми “б” банди (Бир гуруҳ шахслар томонидан олдиндан тил бириктириб содир этилган шахснинг шаънини ва қадр-қимматини камситувчи ҳамда инсон ҳаётининг сир тутиладиган томонларини акс эттирувчи маълумотларни ошкор қилиш);

– 142-моддаси (Фуқароларнинг турар жойи дахлсизлигини бузиш);

– 206-моддаси (Ҳокимият ёки мансаб ваколати доирасидан четга чиқиш) 1-қисми;

– 230−2-моддаси (Тезкор-қидирув фаолияти натижаларини сохталаштириш (қалбакилаштириш) 1-қисми;

– 234-моддаси (Қонунга хилоф равишда ушлаб туриш ёки ҳибсга олиш) 1-қисми.

Уларнинг ҳар бирига 3 йил муддатга ИИВ тизимида ҳамда давлат иштирокидаги корхона, муассаса ва ташкилотларда мансабдорлик ва моддий жавобгарлик юклатилган ишларда ишлаш ҳуқуқидан маҳрум қилган ҳолда 4 йил муддатга озодликдан маҳрум қилиш жазоси тайинланди.

Тайинланган жазони манзил-колонияларида ўтаттирилиши белгиланди.

Жабрланувчилар — Фурқат туманидаги мактаб директори Гулираъно Қосимова ва солиқ инспекцияси бошлиғи Қурбонали Абдураҳмоновга келгусида маънавий зарар ва бошқа зарарлар юзасидан тегишли ҳужжатларни илова қилгани ҳолда фуқаролик ишлари бўйича судга мурожаат қилиш ҳуқуқлари тушунтирилди.

“Жиноят ишлари бўйича Қува туман судининг ушбу ҳукми устидан тарафлар қонунда белгиланган тартиб ва муддатда Фарғона вилоят судининг жиноят ишлари бўйича судлов ҳайъатига апелляция/кассация тартибида шикоят бериш ва протест келтиришга ҳақли”, — дейилади хабарда.

Шунингдек, суднинг алоҳида хабарномаси билан судланувчиларга оид жиноят иши юзасидан бошқа шахсларга нисбатан жиноят ишини қўзғатиш тўғрисидаги масалани ҳал қилиш учун тегишли материалларни илова қилган ҳолда Фарғона вилояти прокуратурасига хабар қилиниши белгиланди.

• Фарғона
• Жиноят
• Суд