Божхона қўмитасининг Контрабандага қарши курашиш бошқармаси ходимлари ДХХнинг Қорақалпоғистон Республикаси бошқармаси вакиллари билан ҳамкорликда гиёҳвандлик воситаларининг савдосига қарши Тошкент вилоятининг Янгийўл туманида тезкор-қидирув тадбири ўтказишди.

Тадбир давомида олдиндан кузатувга олинган фуқаро харидорга 1 кг 12 гр “гашиш” гиёҳвандлик моддасини 13 000 АҚШ долларига сотишни келишиб олади. Кейин эса Янгийўл туманидаги меҳмонхонада келишилган маблағдан 1000 АҚШ долларини олаётган вақтида қўлга олинган.

Кўздан кечирув жараёнида эса фуқародан 1 кг.дан зиёд “гашиш” наркотик моддаси ашёвий далил сифатида олиб қўйилган.

Шунингдек, Божхона қўмитасининг Контрабандага қарши курашиш бошқармаси ҳамда Тошкент вилояти божхона бошқармаси тезкор ходимлари томонидан ДХХ вакиллари билан ҳамкорликда Оҳангарон шаҳрида ҳам тезкор тадбир ўтказилди.

Ушбу жараёнда ходимлар томонидан Spark русумли автомашина белгиланган тартибда тўхтатилиб, холислар иштирокида кўздан кечирилганида унинг юк хонасидаги овоз кучайтиргич ичидан 841 дона “Зардекс” ва 1042 дона “Регапен” номли кучли таъсир қилувчи дори воситалари топилган.

Ўрганишлар давомида ушбу моддалар автомашинада йўловчи сифатида ҳаракатланиб кетаётган 3 нафар фуқарога тегишли эканлиги, улар бу дориларни Оҳангарон шаҳрига сотиш мақсадида олиб кетишаётганлиги маълум бўлади.

Ҳозирда ҳар иккала ҳолат юзасидан божхона органлари томонидан жиноят ишлари қўзғатилган.

• ДХХ
• Жиноят
• Ohangaron
• Toshkent viloyati