Ушбу лойиҳага Ўзбекистон ва Жаҳон банки томонидан старт берилди.

Самарқандда ўтган иқлим форумида Экология вазирлиги ва Жаҳон банки “Ўзбекистонда барқарор ландшафтларни тиклаш” лойиҳасига старт берди. Таъкидланишича, уни молиялаштириш учун 153 млн доллар ажратилади. Мақсад эса деградацияга учраган ҳудудларда ўрмонлар майдонини кўпайтириш ва яшаш шароитларини яхшилашдир.

Лойиҳа 6 та ҳудуд — Жиззах, Қашқадарё, Наманган, Самарқанд, Сурхондарё ва Сирдарё вилоятларини қамраб олади. У деградацияга учраган ерларни тиклаш, маҳаллий ландшафтларнинг барқарорлигини ошириш, экотуризмни ривожлантириш ва кичик бизнесни қўллаб-қувватлашга қаратилган.

Лойиҳани амалга ошириш, шу жумладан, қуйидаги тадбирлар учун Экология вазирлиги ҳузуридаги Ўрмон хўжалиги агентлиги масъул ҳисобланади:

– республиканинг 6 та вилоятида деградацияга учраган ерларни дарахтлардан (агроўрмон хўжалиги, ўрмон плантациялари, боғлар, ўрмон-яйлов тизимлари) тиклаш бўйича ишларни амалга ошириш (ушбу фаолият, шунингдек, ўрмонларни қайта тиклаш ва кўкаламзорлаштириш каби ландшафтни тиклаш фаолияти билан шуғулланадиган маҳаллий аҳоли учун қисқа муддатли иш ўринларини яратади);

– табиий ресурслардан самаралироқ фойдаланиш асосида кичик ва ўрта корхоналарни ривожлантириш учун фермерларга молиявий ва таълим соҳасида ёрдам кўрсатиш;

– муҳофаза этиладиган табиий ҳудудлар ва ўрмон қўриқхоналарини бошқаришни такомиллаштириш ва 6 та ҳудудда барқарор экотуризмни ривожлантириш (лойиҳа зарур инфратузилмани, жумладан, муҳофаза этиладиган табиий ҳудудлар ва ўрмон ҳудудларида туристик марказлар, маъмурий объектлар, кемпинглар, сайр қилиш жойлари, сайёҳлик маршрутлари ва бошқа рекреацион майдонларни яратишни молиялаштиради);

– Ўзбекистонда биринчи бўлиб ўрмон плантациялари бўйича ягона маълумотлар базасини ва Ўрмон хўжалиги агентлиги учун ахборот-коммуникация платформасини яратиш.

Экология вазири Азиз Абдуҳакимовнинг сўзларига кўра, деградацияга учраган ерларга дарахт экиш ландшафтларнинг барқарорлигини оширади, яшаш шароитларини яхшилайди ва иш ўринларини яратади.

“Биз бугун Жаҳон банки билан ҳамкорликда йўлга қўяётган лойиҳамиз Ўзбекистон ўрмон хўжалиги тизимини 2030 йилгача ривожлантириш концепциясида белгиланган мақсадларга эришишга ёрдам беради. Бу ўн йиллик охирига қадар ўрмонлар майдонини 6,1 млн гектарга етказиш масалаларини ҳам ўз ичига олади”, — дейди Экология вазири.

Жаҳон банкининг Марказий Осиё бўйича минтақавий директори Татяна Проскурякова янги лойиҳа Ўзбекистонга шаҳар ва қишлоқларда иқлим ўзгаришига чидамлиликни оширишга қаратилган RESILAND CA+ (Марказий Осиёда барқарор ландшафтларни тиклаш) дастурида иштирок этиш имконини беришини таъкидлаган.

• Битим
• Лойиҳа
• Самарқанд
• саммит