Жорий йилнинг июль ойида Тошкент ва Фарғона ҳудудларида айрим фуқаролар, жумладан, таълим тизимида фаолият юритаётган ўқитувчилар томонидан абитуриентларни олий таълим муассасасига ноқонуний, пора эвазига киритиб қўйишга уриниш ҳолатлари аниқланиб, улар ҳуқуқни муҳофаза қилувчи органлар томонидан қўлга олинганлиги ҳақида хабар тарқалганди. Олий таълим, фан ва инновациялар вазири Қ.Шарипов ушбу ҳолат бўйича муносабат билдирди.

“Мазкур ҳолатлар мутлақо кечирилмас ва кескин қораловга лойиқ ҳаракатлар бўлиб, бундай ноқонуний уринишлар бутун олий таълим тизимига доғ туширади.

Олий таълим, фан ва инновациялар вазирлиги коррупцияга қарши муросасиз кураш тарафдори бўлиб, таълим соҳасида бундай жирканч ҳолатларга мутлақо тоқат қилмайди. Айниқса, бундай ҳолатлар давлатимиз раҳбари томонидан устувор йўналиш сифатида белгиланган ҳалоллик ва адолат тамойилларига зид бўлиб, жамиятда ишончсизликни юзага келтириш хавфини туғдиради.

Ҳурматли ўқитувчилар ва соҳа вакиллари!

Биз сизлардан билим ва тарбия бериш орқали жамиятга хизмат қилишни кутамиз, жиноят содир этишни эмас. Ҳар бир педагог бу муқаддас касб ортида юрт келажаги, инсон тақдири турганини чуқур ҳис қилиши керак.

Олий таълим тизимидаги ҳар бир раҳбар ва ходим коррупцияга қарши шахсий масъулият билан ёндашиши, бу борада фақат қонун доирасида фаолият юритиши шарт.

Барча абитуриентларга шуни қатъий билдираман: ҳеч кимнинг сизни пора эвазига олийгоҳга киритишга ҳаққи йўқ! Сиз фақат ўз билимингиз орқали адолатли танлов асосида талаба бўлишингиз мумкин.

Вазирлик барча таълим муассасаларида очиқлик, шаффофлик ва адолатли рақобат муҳитини мустаҳкамлаш, бу каби ҳолатларга барҳам бериш йўлида иш олиб боради.

Ҳуқуқбузарликка қўл урган шахслар қонун олдида жавоб беради ва уларга муқаррар жазо қўлланилади” — деди вазир ўз муносабатида.

• Муносабат
• Oliy ta'lim, fan va innovatsiyalar vazirligi