Марғилонда Гентра кўчада ўйнаб ўтирган ёш болани босиб кетгани акс этган видео тарқалганди. Фарғона вилояти ИИБ ҳайдовчига нисбатан жиноят иши қўзғатилганини маълум қилди.

Маълум қилинишича, воқеа 2025 йил 10 май куни Марғилон шаҳар Зуҳро кўчасида содир бўлган. 1970 йилда туғилган фуқаро Д.А. Lacetti русумли автомобилини бошқариб кетаётиб, 2022 йилда туғилган А.А.ни уриб юборган.

Кўчада ўрнатилган кузатув камерасига муҳрланган видеода автомобиль йўлда ўйнаб ўтирган боланинг устидан босиб ўтгани, ҳайдовчи боланинг бақирганини эшитмай, ўз йўлида давом этиб, ҳодиса жойидан кетиб қолгани акс этган. Оқибатда тан жароҳати олган болакай шифохонага ётқизилган. ИИБ хабарида айтилишича, ҳозирда унинг аҳволи яхши ҳолатда.

Мазкур ҳолат юзасидан Жиноят кодексининг 266-моддаси 1-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) ҳамда 117-моддаси (хавф остида қолдириш) билан жиноят иши қўзғатилиб, якунига кўра тегишли судловга юбориш чораси кўрилган.

Шунингдек, Фарғона вилояти ИИБ ота-оналарга мурожаат қилиб, фарзандларини қаровсиз қолдирмасликка чақирган.

• Фарғона
• ИИБ
• Жиноят
• Lacetti
• Marg'ilon