Таиланднинг Чиангмай шаҳрида бокс бўйича катталар ўртасидаги Осиё чемпионати ўз якунига етиб бормоқда.

Бугун мусобақада аёллар ўртасидаги финал баҳслари ўтказилди ва унда етти нафар Ўзбекистон вакилалари иштирок этди.

Дастлаб, -48 кг вазн тоифасида Ўзбекистон шарафини ҳимоя қилган Фарзона Фозилова Ветнам вакиласи Лин Чи Нгога қарши рингга кўтарилди ва 4:1 ҳисобида ғалаба қозониб, катталар ўртасидаги Осиё чемпионига айланди.

-52 кг вазн тоифасида баҳсларга киришган Феруза Казакова украиналик Свитлана Уманскага қарши жанг ўтказди ҳамда Ўзбекистон учун чемпионатдаги иккинчи олтинни ишлаб берди.

-54 кг вазн тоифасида рингга кўтарилган ЖЧ совриндори Азиза Ёқубова финалда мезбон боксчи, Таиланд вакиласи Натнича Чонгпронгклангга қарши 1:4 ҳисобида имкониятни бой берди ва мусобақанинг кумуш медалига сазовор бўлди.

 -57 кг вазн тоифасида Ўзбекистон шарафини ҳимоя қилаётган Нигина Ўктамова ҳам финалда мезбон боксчи Пунрави Руенросга қарши жанг ўтказиб, 5:0 ҳисобидаги имкониятни бой берди ва кумуш медаль билан кифояланди.

-66 кг вазн тоифасида Навбаҳор Ҳамидова Хитой вакиласи Хуипинг Юанга қарши жангда 4:1 ҳисобида ғалаба қозонди ва Осиё чемпионатининг олтин медалини қўлга киритди.

-75 кг вазн тоифасида олтин медаль учун даъвогарлик қилган Азиза Зокирова финалда Хитой вакиласи Лина Вангга 5:0 ҳисобида мағлуб бўлди ва кумуш медаль билан чекланди.

Финал баҳслардаги сўнгги Ўзбекистон вакиласи +81 кг вазн тоифасида Олтиной Сотимбоева финалда қозоғистонлик боксчи Елдана Талиповага қарши жанг қилди ва у ҳам тўлиқ давом этган жангда 1:4 ҳисобида имкониятни бой бериб, мусобақанинг кумуш медали эгасига айланди.

Шу тариқа, Ўзбекистон аёллар терма жамоаси Осиё чемпионатини 3 та олтин, 4 та кумуш ва 2 та бронза медаллари билан якунлашди.

Эслатиб ўтамиз, эртага чемпионатнинг эркаклар ўртасидаги финал жанглари бўлиб ўтади, унда 10 нафар Ўзбекистон вакили чемпионлик учун рингга кўтарилади.

• Аёллар
• Бокс
• Осиё Чемпионати