Бугун АҚШнинг Невада штати Лас-Вегас шаҳрида навбатдаги профессионал бокс оқшоми бўлиб ўтди.

Мусобақа доирасида супер ўрта вазн тоифасидаги ўзбекистонлик чарм қўлқоп устаси Бектемир Мелиқўзиев Гана вакили Сена Агбекога қарши рингга кўтарилди. Ўн раундга мўлжалланган жанг еттинчи раундда Бектемир “Bully”нинг техник нокаутли ғалабаси билан якунланди. Мелиқўзиевнинг кучли зарбасидан сўнг рефери ҳисобни очди ва жанг тўхтатилди. Мелиқўзиев шу тариқа ўзига тегишли WBA қитъалараро чемпионлик камарини ҳимоя қилди. 

“Бу жангга худди аввалгиларида бўлгани сингари жиддий тайёргарлик кўргандим. Афсуски, биринчи раунддаги кутилмаган жароҳат бироз панд бериб қолди. Рақибим бош билан зарба бериб юборди ва натижада қошим ёрилди. Шунга қарамай, ўзим учун муҳим ғалабани қўлга кирита олдим ва бундан жуда хурсандман. Мени қўллаб-қувватлаш учун келганлар, телевизор қаршисида жангимни томоша қилган барчага раҳмат айтмоқчиман. Кетма-кет иккита жангда ғалаба қозондим. Мақсадим – жаҳон чемпионлик камари! Ўйлайманки, тез орада биргаликда бу камарни Ўзбекистонга олиб кетамиз. Мен чемпионлик жангига тайёрман”, – деди Мелиқўзиев. 

Маълумот учун, 29 ёшли Бектемир проф фаолияти давомида 18 та жанг ўтказиб, 17 та ғалаба ва 1 та мағлубият қайд этган. Унинг бугунги рақиби 33 ёшли Сена Агбеко ҳисобида эса 29 та ғалаба бор, бугун у бешинчи мағлубиятини қабул қилиб олди.

• АҚШ
• Бокс
• Las-Vegas