Саргузаштлар ишқибози ва археолог Жорж Риджуэй Шарқий Англиянинг Ипсвич шаҳридан Рим империяси ва темир даврига оид 748 та олтин ва кумуш тангаларни топди. 

Қайд этилишича, бу бир неча йил олдин содир бўлган, аммо тафсилотлар яқиндагина оммага эълон қилинган.

31 ёшли Жорж қассоб бўлиб, болалигиданоқ Харрисон Форднинг “Индиана Жонс” филмига ҳавас қилиб келган. У ёшлигиданоқ ковбойлар сингари шляпа кийиб, қўлида қамчи кўтариб юради.

У 2019 йилнинг сентябрида “Google Earth” хариталарини кўздан кечираётиб, Ипсвич яқинидаги Суффолкда ғайриоддий дала схемасига дуч келди. Сўнгра металл детекторни олиб, сафарга отланади.

Риджуэй у ерда милоддан аввалги 46-47 йилларга оид Юлий Цезарнинг кумуш динорини топади. Яна бир неча соатлик қидирувдан сўнг яна 180 дона танга топилади, сўнгра синган қозон қисмлари ва бошқа тангалар “кўриниш беради”. Унинг фикрича, бу пулларнинг барчаси битта кеш сифатида бирга кўмилган.

Археологлар билан ишлаган ҳолда, қолганларини – жами 748 дона тангани қазиб олиш учун тахминан уч ой вақт кетган.

Британия Темир даври хазиналари ва Рим тангалари музейи куратори доктор Элеанор Хэйнинг айтишича, бу ҳозирда Британияда топилган энг катта қимматбаҳо металлар хазинаси бўлиб, Клавдий I ҳукмронлиги даврига (мил. 41-54 йиллар) тўғри келади.

“Бу ғайриоддий топилма, чунки хазинада келтлар етакчиси Кунобелинус (Шимолий Темза минтақасини бошқарган ва Кольчестерда базаси бўлган) давридаги темир даври тангалари Рим тангалари билан бирлаштирилган. Шарқий Англияда топилган бошқа аралаш хазиналар одатда Рим тангаларини Норфолк ва Суффолкдаги маҳаллий темир даври Шарқий Англия тангалари билан бирлаштиради”, – дейди Хэй.

Музей вакили Клавдийнинг мил. 43-йилда – Буюк Британия римликлар томонидан босиб олинишидан сал аввал зарб қилинган олтин тангага алоҳида эътибор қаратди. Унинг сўзларига кўра, бундай тангалар жуда кам учрайди.

Ҳозирда хазинани Лондондаги Британия музейи вакиллпри томонидан баҳолаш жараёни кетмоқда. Ушбу ёдгорликлар учун якуний мукофот Жорж Риджуэй ва хазина топилган Суффолкдаги ер эгаси ўртасида бўлинади.

Риджуэйнинг ўзи бу топилмани ҳайратланарли ва ақлбовар қилмас, деб атаган, бироқ у буни фойда учун эмас, балки тарихий топилмаларни қидириш учун қилганини таъкидлади.

Жорж хазина яқинида қадимий Рим шаҳарчаси бўлиши мумкин, деб ҳисоблайди. Энди у маҳаллий археологлар билан биргаликда шаҳарни топиб, уни ўрганишга ҳаракат қилмоқчи эканини маълум қилган.
 

• Arxeolog
• Qassob
• Хазина