Британия ҳукуматининг янги раҳбари Кей Стармер Украина президенти Владимир Зеленскийни Лондон қўллаб-қувватлашда давом этишига ишонтирди. Бу ҳақда давлат раҳбарларининг телефон орқали мулоқотидан сўнг бош вазирлик идораси тарқатган баёнотда айтилади, дейди “Анадулу”.

“Бош вазир суҳбатни ўз лавозимига келган биринчи кунидаёқ Буюк Британиянинг Украинага содиқлигини яна бир бор тасдиқлаши у учун нақадар муҳим эканини таъкидлаб бошлади”, — дейилади ҳужжатда.

Унинг қўшимча қилишича, консерватив ҳукуматдан лейбористлар кабинетига ўтиш “Буюк Британия қўллаб-қувватлашига ҳеч қандай таъсир кўрсатмайди”.

Шунингдек, у Лондон “Украинага мудофаа ёрдамини кўрсатишда давом этишини” таъкидлаган.

Келгуси ҳафта бўлиб ўтадиган НАТО саммити, шунингдек, 18 июль куни Буюк Британия мезбонлик қиладиган Европа сиёсий ҳамжамиятининг саммити ҳақида мавзулар кўтарилган.

Стармер Зеленский билан тез учрашишга умид билдирган ва у билан яқин алоқада бўлишга рози бўлган.

• Британия
• Зеленский